Posts
Ziangruangah "Nauhak Hrang Pathian thu" ti mi blog ka tuah?
Ka
nauhak lai ihsin Pathian thu, a hleice in rundamnak thu ka theifiang lo
pang ding ti mi hi ka rak phan bik mi a rak si theu.Ka mang ringring
lai, kum 9 ka silai ah kan kohhran ah Gospel camping a rak um dah ih kum
11 ri lawng lut thei an rak ti. Kha laiah ka rak nauhak deuh fawn
thawn, luh ka dil rero cing in, "Na nauhak tuk lai, midang na hnaihnawk ding," in
rak ti. Ka thlarau nun kha a rak hal tuk ih Pathian thu, rundamnak thu
kha theih ka rak duh zet nan, ka kum a rak nauhak deuh ruangah lut ngah
lo in ka rak um. Khai tum ka lut ngah lo mi ka ruahsal tin ten ka
mitthli a hal theu. "Khai tum ah rak lut ngah bang seh la kum nauhak te'n ka piangthar ding si khawh!" ka ti aw ringring theu. Ka sim duh mi sawn cu, nu le pa a tam sawn hin kan fa le tam sawn hi "Nauhak an si lai, Pathian thu tla an thei thiam ngaingai hrih zik lo," ti'n
an thlarau nun ruat lo in kan rak thlahdah aw pang ding a phan um nasa.
Kum 9 cu sim loh kum 6 mi hmanin rundamnak thu hi an theifiang thei zo a
si. Kan theih loh in kan fa le hi thlarau lamah nun ti hal zet tla an
rak si thei, an va si lo hman ah an thlarau nun cu kan ruat sak a tul
law law a si.
Ka
thuanthu cu vun peh vivo seh la, kan kohhran hi nauhak thlarau ngai
pawimawh zet an rak siih tutiangin an ngai pawimawh zet lai. Tlawng
cawlh tinten crusade in rak tuah sak ringring theu. Testimony tla in rak
sim fial theu ih, mah fiang ruang si lo, saya/sayamah ttih ruangah tla
tet-ti kan rak khan phah theu. Rundamnak cu a thu in byheart neknek hman
seh la keimahah fiangnak ngaingai a rak um lo ih, hell ram tlak ding ka
rak tih tuk theu. Cu
hlei ah upa si hnu, kohhran up lo le nu bu hruaitu si lawng le khi
piangthar thei le piangthar dingah ka rak ruat. Nauhak cu piangthar thei
dingah ka rak ruat dah lo law law. A thupten hitin thla ka cam theu, "Bawipa, ka upat tik len zangfahten i piangthar ter aw maw,"
ti'n. Pathianin ka thlacamnak i san hleih ah nauhak khal an piangthar
theiin rundamnak theifiang thei an si tuk, ti in theihfiang ter duh
ruangah tla a si ding, kum 13 ka si kumah Sayamah Ma Chit ih nauhak crusade tuahnak ah piantharnak cu ka rak co a si. Ka
hna theihnak le ka thluak theihnak hmangih ka rak byheart tuk zo mi,
nun sung mu ril ih ka theihfiang ngaingai lo mi pawl kha Pathian zarah
ka vun theifiang hnu cun, hell ram tlak tih-nak pawl hmuahhmuah kha an
hlo theh a si. Ziangah ti asilen,
Kolosa 3:3 ih a sim vekin, "Kan nunnak ngaingai cu Khrih hnenah Pathian hnenah thuh in a rak um zo a si." Khrih
ih umnak hmun cu ka umnak, a fehnak ding hmun cu ka fehnak ding hmun a
si ti fiang ten ka vun thei tik ah ka lungawi thluah thlo a si.
Saya/sayamah pawl ih fial cawp ruang si nawn lo in mah nunnak rori in a
fiang zo ruangah nun hna-ngamnak le thih thlangamnak cu Pathian
zangfahnak zarah Khrih ruangah ka rak nei ve zo a si. Ka lungawi tuk ti
hmanin a daih zik lo. Keimah rori ka nauhak laiih piangtharnak co ka si
ruangah kan nauhak pawlin rundamnak thu hi an fiang ve lo pang ding ti
hi ka phan bik mi a si.
Nu
le pa pawl tla, kan fa le pawlih thlarau fehnak ding hi kan ruahsak
ciau kei uh. An nauhak tuk lai kan ti pangih kan daithlang sual pang
ding a phan um zet.Kan mah rori in kan simfiang thiam lo hman ah Home
crusade tla kan ko sak kei uh. Tu hi rundamnak caan sunglawi a si, hi
caan hi a cem zik cuah co zo. A tlai hlan ah kan fa le pawlin rundamnak
an co ding hi a thupi bik a si. Kan sungza te ih vanram kan kai ding hi a
thupi zet a si.
A netnak ah, hi mi blog Nauhak Hrang Pathian Thu
tuah asinak tla hi kan fa le pawlin mai tong te ih rundamnak
thuthangtha siar ding an neihnak ding hrang le, Nu le Pa pawlin siar
bawm ih kan fa le pawl rundamnak thuthangtha kan sim thiamtheinak ding
hrang ruat ih tuah mi a si. Ngan thiam tuk ruang tla a si lo, a tul sawn
ruangah a si. Ngan ding thuruahnak tha ka neih vivo nak dingah
Thlacamnakin in bawm ciau uh. In siarsak tu hmuahhmuah parah ka lungawi. Pathianin lo thlawsuah vivo seh. Amen.
Admin
Van Bawi Sung
Adelaide, South Australia
Email- vbsofficial23@gmail.com