Posts
Bible siar ding: John 3:16
Laksawng umzia cu man um lo ih ngah mi, lole hlawhsuah tul lo ih pek-awk theu mi thil a si. A tlang piin minung lakah cun laksawng hi birthday caan, mopuai caan ah le Christmas caan ah pek-awk theu a si. Exam/ Zuamawknak ruangih ngah mi thil hi cu laksawng si lo in hlawhsuah rori mi a si ruangah lawmman a si.
Kan theih cia zo bangin laksawng hmuahhmuah lakih sunglawibik cu Pathian ih in pek mi laksawng Zisuh Khrih hi a si. A ropitbiknak san cu leitlun ih laksawng an pek mi hi zoh sehla misual hrangih an pek mi hi a um dah lo, an lainat mi le duhdawt mi hi an pe tlangpi, cuihlei ah leitlun ih pekawk mi laksawng cu kumkhaw daih a si ve lo. Asinan Pathian ih in pek mi laksawng cu kumkhaw daih mi a si. Cui laksawng cu mi hmuahhmuah hrang asinan a zumtu/ co hlangtu hrang lawngah hmual a nei a si(1Tim 4:10). Co hlang duh lo tu hrangah cun umzia a um lo.
Pathian ih laksawng Zisuh Khrih kan rak co hlang/pawm tikah ziang hmual saw a neih / a co hlangtu in ziang mi an co hngah?
1. Kumkhaw nunnak (John 3:16, 36) : Pathian ih laksawng Zisuh a co hlang ih pawmtu cun a lakin kumkhaw nunnak pekin an um cih a si. Thil ziang dang khalih lei thei lo le pek thei lo mi kumkhaw nunnak cu Zisuh a rak co hlangtu hnenah pekin a um a si. Cu cu Pathian laksawng na rak co hlan ruangah a si. Co hlang lo, pawm lo tu cun cui kumkhaw nunnak cu a nei ve thei lo a si. Cui ruangah Zisuh zumtu si hi a hlawk a si.
2. Sual ngaidamnak (Heb 10:11) : Pathian ih laksawng Zisuh kan rak co hlan tikah kan sual hmuahhmuah cu ngaihdam sak le hngilh sakin a um theh zo a si. Setan cun na sual nak pawl hmuahhmuah lo man ter ih thangso thei lo dingin lo tuah a tum, asinan hi hi thei ring ring aw, na sualnak pawl hmuahhmuah cu Pathian in Zisuh Khrih na co hlan ni ihsin a lo ngaidamin a lo hngilh theh sak zo a si. Setan cun na thinlung ruahnak hmangin Pathian in na sualnak pawl a hminsinin a lo hua vekin lo bum rero a tum ding, asinan Bible ah cun “ An sualnak le an palhnak pawl ka cing ringring nawn lo ding” a ti a si. Cucu na co hlan mi Zisuh ruangah a si.
3. Pathian fa si nak ( Gal 3:26): Zisuh nan zum ruangah Pathian fa nan si, in ti. Zisu rak zum lo, co hlang lo tu pawl kha cu Pathian in ziangtin a ko? Setan fa tin a ko a si. Kan nih tla Pathian ih laksawng Zisuh kan co hlan/ pawm hlan kha cu Setan fa tiih kawh mi kan si ve, asinan Zisuh kan pawm ve ten Pathian fa sinak in pe a si. Mi tam pi cun Pathian fa si tumin tan an la, asinan an tan lak dan a dik loh ruangah fa sinak an co thei lo, kan nih cu Zisuh zumnak ruangah fa sinak cu kan co a si.
4. Pathian ro luahtu ( Gal 3:29, 4:7) : Pathian ih laksawng Zisuh co hlang tu kan si ruangah Pathian in a ro luah tu sinak in pe a si. Tuizanah leitlun dinhmun khalah ro luah ding nei lo theh kan si. Inn le lo nei lo, fa te kha ro pek ding nei lo theh kan si. Asinan Zisu zumtu kan si ruangah kan za ten ro hmuahhmuah lakih ropi bik Pathian ro luah tu kan si. A va sung lawi ve! Kan fale hnenah lei ro thil pek ding kan nei lo tla a si ding, rehse ding kan si lo, a pawimawh bik mi Zisuh Khrih hi an ro hrangah na tan ta thei a si. Cutin ro hmuahhmuah lakih ro tha bik fale hrangih tan tu na si ve ding a si. Cu hnakih tha sawn thil dang a um lo.
5. Pathian rualpi sinak ( Rom 5:11) : Raal tiih kawh mi kha Pathian ih laksawng Zisuh kan rak cohlang ruangah Pathian ih rualpi sinak co mi kan si. Rualpi tha kan nei lo tla a si ding, asinan rualpi hmuahhmuah lakih a tha bik mi ziang kim ti thei rualpi Pathian kan nei a si. A ni cun kan siatnak in tuah sak dah lo ding, kan thatnak ding lawng in ruatsak a si. Pathian thawn rem aw zo le rualpi kan si theinak san tla hi Zisuh ruangah a si. Cui ruangah Pathian hi na parah a thin a heng nawn lo ti hi thei ring ring aw.
6. Mi thlawsuak sinak ( John 20:29) : Pathianih laksawng Zisuh a zumtu/ cohlangtu pawl cu, "mi thlawsuak" tiih kawh mi kan si thu kan hmu. Kan mit in Zisuh kan hmu lo nan kan zum tikah mi thlawsuak sinak kan co a si. Miih ziang hman ih siar loh mi tla na si ding, asinan Pathian cun a lo ngai pawimawhih a lo ngaihven ringring fawn a si. Ziangahtile Pathian hrangih mi hleice le mi thlawsuak na si ruangah a si. Cucu Zisuh Khrih ruangah a si.