Posts
Kan sinak thar thei thiam thei ding cun kan sinak
hlun kan theihfiang hmai a rak tul theu. Pathian mit hmuhah cun leitlunah
minung phun hnih lawng kan um, Adam/Setan hrin le Khrih/Pathian hrin tin kan
um. Khrih a zumtu hmuah hmuah hi Pathian hrin tiih kawh mi kan si (John 1:12).
Zisuh kan rak zum hlanah kha cun Pathianin Adam sungah in hmu ih kan dinhmun
pawl kha a se zet mi le fih nung zet mi pawl an si. Kan fellai bik hman puansia
vek men lawng an rak si (Isai 64:6). Pathian ih thinhengnak fa kan si. A ral pa
Setan ih fa kan si. Pathian lakah ziang hman beisei ding nei lo kan rak si. Cu
tluk ih dinhmun tha lo a neitu pawl cu, Zisuh kan zum hnuah Pathianin
sinak/dinhmun thar in pe a si. Cu pawl cu…
1. Pathian fa sinak in pe (John 1:12):- Zisuh zumtu
na/kan si ve le ten Setan fa sinak ihsin Amah Pathian fa sinak dinhmun thar kan
ngah cih a si. Tuizan ih a ra khawmtu zaten Pathian ih fa kan si theh a si.
Pathian fa si cu a sunglawibik mi sinak a si. Leitlun lal pawlih fa kan si ban
loh laiah van le lei sersiam tu Pathian ih fa sinak kan nei hi cu a ropi bik mi
a si. Pa in a fate hrang a ruat ring2 vekin kan Pa Pathian khalin kan hrangah
ziangtin kim hi in ruahsak ring2 a si. 1Peter 5:7 ah cun, “nan mangbangnak
hmuah2 a mai hnenah hlan uh, a nin a lo ngaihsak a si” a ti. Curuangah kan
nitin nunih kan harsatnak pawl le kan mangbangnak pawl hi kan Pa a si mi,
ziangkim ti thei Pathian hnenah kan hlan theu kei uh.
2. Ro cotu sinak in pe (Eph 3:6):- “Khrih ih
thuthangtha ruangah Jentail pawl tla ro cotu kan si” thu Paulin a rak sim. Hi
leiah inn tha lo tha, sumpai hauhsaknak neilo hman ningna vanah ro co ding mi
kan nei a si. Pathian ro cotu ding kan si. Sinak na men lo neitu kan si.
3. Thianghlim, dingfel sinak in pe (1Kor 1:30):-
Setan fa kan silaiah kha cun thiltha ziang kha tuah mengmang hmanseh la “puanse
bal” vek men kan rak si tho tho. Asinan, Zisuh zum hnuah cun puanse bal vek
tluki tenum leh thatnak neilo pawl kha mi thianghlim ah in pawm zo ih hleiah,
mi dingfel, sual neilo vekin in pawm a si. A va ropui ve! Zisuh zumnak pakhat te
ruangah cui dinhmun cu na co ngah a si. Minung lamah fel lohnak tampi na nei
ding, kan nei theh ding, cu mi hmangin Setanin lo bum a tum rero ding. “Nang cu,
na cu ti kha ti kha, Pathianin a lo pawm ngai ngai zik lo, na sual em kha bla bla
bla..” na thinlung ruahnak hmangin a lo thua tum rero ding. Asinan, Pathian ih
a lo pek mi Khrih ih na dinhmun thar kha mang ring2 aw. Pathianin na si, a lo
ti mi sawn kha na sinak diktak sawn cu an si. Nang chu Khrih zumnak ruangah mi
thianghlim, dingfel na si.
4. Khirh ih palai (2Kor 5:20):- Hi tawkih palai hi
nupi pasal dilawk zikih palai an fial mi vek men hi a si lo. Ram pi pakhatin a
rampi ai-awh ih palai a thlah mi vek hi a si. An thlah mi palai parah an ram pi
kha a thum aw theh a si. Cu ruangah dinhmun sang zet a si. Kan ni zumtu pawl
khal leitlun palai pawl hnaki ropi sawn Khrih ih palai kan si. Khrih ai-awh tu
kan si. Kan mah parah miin Zisuh an zum ding le zum loh ding a thum aw theh zo a
si. Curuangah zumtu pawl hi Biakinn ah lawng zumtu sinak langter ding mi kan si
lo, kan va fehnak le kan umnak hmun ih kip ah Zisu ai-awh tu kan si theh a si.
Rom 14:8 “Kan nun a si le Bawipai hrangah kan nung, kan thi a si kha le Bawipai
hrangah kan thi. Curuangah kan nun khal ah thih khalah Bawipai ta kan si,” a ti
vekin kan ziangkim tuah mi hmuah2 hi Zisuh thawn ih pehzawm aw theh an si.
Kohhran hruai tu sinak cu kan hnatuannak ti vek ah a hman theih loh. Asinan,
Khrih palai kan sinak dinhmun ah cun kan ziangkim tuah mi thawn a peh aw theh
zo a si. Curuangah zumtu pakhat kan nun hi a pawimawh zet mi le thupi zet mi a
si. Kan nitin nun ih kan tuah mi ih zirin miin Zisuh an zumin an zum lo ding a
si. Curuangah zumtu cu daithlang zetih um men men a ngah lo a si. Ziangah tilen
Khrih ih palai kan si ruangah a si.
5. Van khua le ti sinak le a puithiam sinak in pe
(Thupuan 1:5-6):- Zisuh zumruangah van khua le ti sinak men lawng si lo in
puithiam sinak in pe a si. Hlanlai san ah cun mipi pawlin Pathian kha direct in
an rak be thei dah lo, puithiam fehtlangin an rak be theu, asinan tu ah cun
Pathian in biaksaktu dingah puithiam dang kan tul nawn lo, kan mah ten Pathian
biak pawh theinak kan nei zo a si. Puithiam pawl hnen ih sual thu phuangih,
sual ngaidam sinak dingah dil ter a tul rero nawn lo, kan mah ten Pai hnenah sual
thupha cawi theinak kan nei zo a si. Ziangtik lai caan khalah Pathian na be
thei zo a si.
Zisuh zumtu pawl ih sinak/dinhmun pawl kan zoh tikah mi
men men kan si lo a si. Pa ve men men, nu ve men men le mino ve men men kan si
lo, Khrih ih palai kan si. Pathian ih fa kan si. Pathian ih roluah tu, a mi
thianghlim le dingfel, a puithiam le van khua le ti mi kan si. Khrih ih kan
sinak pawl hi kan theifiang sin sin a si len kan nitin nun ah zumnak lamah
lawng si lo, Khrih bangnak nunah kan thangso vivo ding a si. Thianghlimnak nun
lam khalah hma kan sawn vivo ding a si. Khrih ih kan sinak vekih kan langsuah a cu tuk zo a si. Kan dinhmun
thar theiih Khrih bangnakih kan thanlen vivo theinak dingah Pathianin thlawsuah
in pe hram seh. Amen.