Posts
Bible:
Matthai 20:20-21 (BSI) – Cule Zebedi nupi cu Jesuh hnenah a fapa pahnih thawn an
ra; Jesuh hmaiah cun a kun ih zaangfah a dil. “Ziang so na duh?” tiah Jesuh in
a sut. Anih in “Siangpahrang na si tikah hi ka fapa pahnih hi na vorhlam le na
kehlam ih an to theinak dingah thu I kam aw,” tiah a ti.
Pathian
in profet pawl hnen ih a rak simcia zo bangin Israel mipi pawl hin miphun dang
uk-nak sung ihsin runsuaktu ding an Messiah ra suak ding hi an hngakhlap bik mi
a si. Jesuh san laiah tla khan Rom cozah kut tangah an um ih, cui dinhmun ihsi
suah zangzang hi an duhbik mi a si. Asinan Pathian ih tumtah mi le Israel
pawlih ruahnak bangaw lo mi cu hitin a si. Pathian cun Messiah a ra suah ding
thu a phuang tikah leitlun minung pawl sual ihsi rundam ding hi a tumtah mi a
si. Asinan, Israel mipi pawlin Messiah an rak beisei dan cu politician Messiah
a rak si ziar. An ruahdanah cun an Messiah a ra dingih Rom cozah kut sung ihsin
in runsuak ding. Cule siangpahrang a ṭuan dingih, a lal ram a
din ding, ti hi a si. Minung tisa lam thu ih ra dingah an ruat. Cutivekih an
ruah ruangah Zebedi nupi khalin a fale hrangah thil a dil tikah Jesuh in, “Nan
dil mi hi ziang kan dil ti nan thei lo (v22),” a tinak san a si.
Zebedi
nupi nun ihsin ziang kan zirthei ti asilen,..
1. A fale in dinhmun tha an co ding
a duhsak
Zebedi
nupi ruahnak le Jesuh ih tumtah mi a bangawk lo hmanah a fale pawlin dinhmun ṭha
an co theinak dingah khawruahnak ṭhazet a nei. Cucu Khrih
ih vorhlam le kehlam ih to theinak ding hi a si. A fale a duhdawtzet ti a fiang.
Kan nih tla kan fale kan duhdawt zet ko ding. An hrangah ziangkim tuah thei mi
pohpoh tuah tla kan duh ko ding. Dinhmun ṭha an co dingtla kan
duh ko ding. Asinan, Pathian hnenah rundam an sinak ding hi kan dilsak dah maw?
Rundamnak theifiangtu, rundam fa, Jesuh thawn kumkhua ih lengtlang theitu an
sinak ding hrang, kan dilsak ve dah maw? “Sunday school punghmanin an kai ko si, Bible tla an siar
ko si,” ti’n kan rak duhtawk mai maw? Cuvek men ih kan lungawi
hluahhlo thei asiahcun kan fale pawl hell ram lamzin an zawh rero tinak a si
ding. Ziangahtile, Sunday school kai le Bible punghman siar men hi a tawk lo,
Khrih rundamnak theihfiang rori hi a ṭul a si. Cuiruangah kan
fale hrang napi’n thlacam uh si. Dinhmun ṭha (rundam fa sinak) an
conak ding hrang Pathian hnenah dil ve uh si.
2. A fale a ngaihsak
Ziangruangah
Zebedi nupi in a fale hrangah Jesuh hnen thil a dil ti asilen, a fale a
ngaihsak, a ruat tuk ruangah a si. An sanlaiah nu tampi fapa nei an um ko nan
Zebedi nupi lawngin a fale hrang Jesuh hnen a dilsak a si. Nu le pa pawl,
nuntuh khawsak ruatah fale ngaihsak man lo tiangin kan buai pang maw? Kan buai
caan a tam sawn ding ka zum. Thildangah kan fale hrang ti’n kan ruatin caan kan
pek man lo hmanah “Rundamnak an fiang maw fiang lo,” timi tal hi cu theifiang
kan tum pei uh. Zebedi nupi tla kha hnaṭuan neiin a buai ve
caan a tam tuk ko ding. Asinan a fale a ngaihsak a si. Nauhak ti’n a tan siang
men lo. An hrangah ti’n thu saupi a ruahsak a si. Nu pakhat cun a fale
rundamnak an fiang maw fiang lo ti hi a khat tawkin a sut ringring ṭheu.
Ziangahtile rundamnak co lo nun ṭihnungzia a thei
ruangah a si. Cuvek nu le pa kan si ding hi a pawimawh ngaingai. “Nauhak an si
lai, cu vek a tul lo,” kan ti men pang ding a phan um tuk. Nauhak
pawl tla hi kan mah upa vekin thlarau nei ve an si. Thi ve thei an si. “Thihnakin
nauhak upa a thliar lo,” ti a si kha! Innsang cawmawknak hrang
buaituk ruangah kan fale pawl caan kan pe theilo a si hmanah rundamnak an fiang
le fiang lo ti tal hi cu theifiang kan tum hram pei uh. Kan ngaihsak pei uh.
Zebedi
nupi cun Jesuh hnenah, “Thu I kam aw,” a ti a si. "Jesuh hnen an um ve
rori ding," timi theifiang fekfek a duh. Cui thinlung put cu nu le pa tla in kan
fale hrang kan nei ve a ṭul a si. Zebedi nupi bangih fale dinhmun ṭha
an co ding duhsaktu le fale thlarau hrang ngaihsaktu kan si ciau nak dingah
Pathian in thlawsuah lo pe vivo hram seh! Amen.