Posts
Zumtu hi rundamnak kan mah in kan fiang hnu khal ah daithlangzet ih um hi awlte asihlei ah, mi tampi cun midang in rundamnak an fiang ding tla kan buaipi nawn lo. Ahleice in nu le pa piangtharcia zo khal in kan fale rundam an sile silo hi kan ruahsak tuk lem dah lo. “An nauhak lai pam. Nauhak si an si lai,” tiah hnangamten kan umsan theu. Cule dam ringring ding ah tla kan ruataw theu. “Nauhak an silai” kan ti rero laiah an nun cem bang sehla ziangtin kan tuah ding? Joshua cun, “Kei le ka innsang cun Bawipa lawng kan rian ding,” a rak ti. An innsang za ten rundamnak an co zo ti cu a fiang na sa. Thukamthar sungih Gentel innsang rundamnak co hmaisabik Cornelius te tla kha, an sungin rundamnak an co a si. Tuini ah kan innsang thlarau dinhmun ruatsal ciau seh la, kan zaten kan him zo maw? Nu le pa kan him zo a si hman ah kan fa le pawl teh an him zo maw? Ziangtik ah kan thi ding ih ziangtik tiang kan nungin kan dam ding ti len kan sim thei fawn lo. Cuiruangah kan dam sungah sung zate ih rundam kan si ding hi a thupi bik mi a si.
Mi tampi cu kan pumpi hrang ah sumpai hawl in kan caan kan cemter. Innsang hrangah ti’n tangka hawl a tul tuk ti cu kan thei thiam theh ko ding. Asinan, kan hawl tuk hrat ruangah rundamnak co ngah lo in mual kan liam pang ding ti tla a phan um nasa. Zisuh cun, “Mi pakhat in leitlun le a sung ih um hmuahhmuah co hman sehla a nun a sung asiah cun ziang so tha hnem,” (Mathai 16:26) a ti a si. Sumpai tampi nei hi a sualnak a um hrimhrim lo, asinan cui hlawnthilri pawl nei ruri hmansehla rundam kan si silo cun ziangsi thahnem? Rundamnak kan co ngah lo pang ding ti hi a phan um bik mi a si. Hawl hmai ding mi kumkhaw nunnak hi kan hawl hmaisa a tul ngaingai a si.
Nu pakhat ka theih mi cun, “Ka fa dang pawl hi cu rundamnak an fiang zo ko, asinan a nau ta bik hi cu ka thei hrih lo. A fiang lo pang ke ti phangah ka sut leuh leuh theu,” a ti. Cuhlei ah “Rundamnak thu tla ka sim leuh leuh,” a ti a si. Cawntlak a va si so! Thukamhlun kan zoh asilen Israel pawl Pathian in Egypt ram ihsin a runsuah dan le thil mak a tuahsak mi hmuahhmuah kha, an te fa sin tiang sim sawng vivo ding in le sim ringring dingin a fial a si. Tuini ah kan nih pawlin kan fa le pawl ziang mi kan sim ve ding? Khrih Zisuh ih rundamnak, sual sal sung ihsin le kumkhaw hell sung ihsin in runsuahnak thu pawl hi kan sim ve rero ding mi cu a si. Kan nun ih Pathian kut cak mangbangza alang mi pawl tla sim rero ding mi khi kan si. Cutin Pathian kan zumnak kan fale pawl in an hmu ding ih, an zumnak tiang a ti hnget ding a si. Hi mi blog ah tla “Nauhak”
ti mi sungah “Rundamnak thu” zir ter nak lessons pawl ret a si. Cu mi hmang tla
in kan fa le kan zirh thei a si. Kan fa le hi nauhak tin kan tan men pang ding
ti a phan um na sa. Pathian hrangah upa thlarau le nauhak thlarau hi man bang
aw a si. Kan zate ih rundam kan si ding hi a duhbik mi a si. Pathian in
tlawsuah lo pe hram seh. Amen!