Posts
Bible: 1 John 5:10, Hebru 11:1
Kan Pathian in ziangmi a ret pawimawhbik ti asilen kumkhaw nunnak kan neih ih van kan kai ding hi a si. Cumi hrangah Zisuh a rat ternaksan khal a si. Khrihtian ka si ti aw poh cun vanram kan kai hi kan duhbik mi le kan beiseibik mi tla a si. Piangthar si loh tla hi kan duh lo. “Kei cu ka piangthar” timi hi tulainak ah a cang zo. Asinan piangthar ti aw pawl tampi hin buainak a thupin kan nei ṭheu. Cu mi cu, “Kei hi vanram ka kai ngai ngai pei maw?” tiih ṭih thup-nak a si. Biakinn ah kan thei tawkin hna kan ṭuan, hla kan hruai, nauhak kan zirh, missionary kan cawm, member rinum kan si, kan ti ko ding. Asinan, tu ih thiltha le mawi na ti mi pawl hmuahhmuah kha tuah lo in um bang ta aw la, vanram kai dingin fiangnak na nei lai tho tho maw? Nei nawn lo sawn saw?
Ka rualnu rundamnak thu thei khepkhep ṭheh zo cun hitin in sim, “Thu ka ruat rero len vanram tla hi ka kai lo pang ding ih, hell ram tla ka tla pang ding ti phannak ka nei ringring a ti.” Bible cun zumnak(faith) thu ah fiangten in sim, thil kan hmuh loh mi, a um a si tiih fiangte ih theihnak, (Heb 11:1) a ti a si. Rinhlelhnak a um lo tinak a si. Tahṭhimnak ah, Pathian kan mitin kan hmu lo nan, fiangten a um ti kan thei vek hi a si. Zisuh a zumtu ngaingai cun, amah le amah ah fiangnak a nei a si. “Na fiang ve ngaingai maw? Thiam aw cawp men saw na rak si?”
Hi thu thawn pehparin, kan rundamnak thu theih mi thu-ah kan fiang sinsinnak ding hrangah, atang ta pawl hi rel ka duh a si.
1. Sualman cu thihnak a si (Rom 6:23)
Hi Bible chang thu hi ṭhaten kan ruat asilen, sualnak man tih siloin, sualman a ti ruangah, nitin kan nunnak ih kan ti sual mi pawl a sim duh mi siloin, Adam hnen ihsi kan ngah mi sual, chi kha a sim duh mi a si. Cui sualman cu thihnak a ti tikah, sual nei hmuahhmuah cu thi ding, hell ram tla ding kan si. Hi sual neilo tu zo hman kan um lo, hell ram cu kan fehnak ding a si zia a fiang nasa. Asinan Pathian in ziangtin a run phisin?
2Korin 5:14 “Mi hmuahhmuah thih ai-ah mi pakhat a thi. Cutikah mi hmuahhmuah cu an thi a si,” a ti. Mi pakhat a thi mi cu zo a si? Zisuh a si. Zisuh ih thihnak cu mi hmuahhmuah thihnakah Pathian in in pawmsak tinak a si. Cu mi sullam cu, “Sualman leiba kan neih mi, thihnak,” kha Khrih fehtlangin kan pek fel ṭheh zo tinak a si. Tongdangin sim len, hellram tlaknak lak ihsin luat zo, kan si tinak a si. Ziangahtile hell ram tla ding ih in tuahtu sualman leiba kha pek fel a si zo ruangah a si. Nangmah ten, “hell ram ka tla pang sual ding,” ti ah rulh na rak tum ciam co lai maw? “Cu mi kha mi ka ti ve loh pang cun vanram ka kai lo pang ding,” ti’n na ruat buai lai maw? Ruahnak cang kha thiam lo, tha ve huah hi men saw na rak si? Zisuh Amah rori in Kross parah in rak peksak zo. Cuiruangah a si Kolosa 3:3 ah, “Nan thi zo ih, nan nunnak taktak cu Pathian ah cun Khrih hnenah thuh in a um a si,” a tinak san. Bible cun, Khrih ih kan leiba inpeksak zo ruangah, nang cu leiba nei nawn lo, vanram kai ding list ah a lo ret zo a si. Cu cu ziangtin kan theithei? Nan thi zo ih (Leiba nan pe zo ih) Khrih ah nan nunnak a thup aw, a ti a si.
2. Nitin kan sualnak pawl in ngaidam (Lev 4 siar aw)
Thukhamhlun san ih Israel pawl raithawinak kha kan thei ciau ding ka zum. Pathian in Moses hnenah an thilti sual mi pawl ngaidam ih an um theinak dingah ran thisen hlan dingin a sim ter hai. Pathian hi a ti fekfek tuk. An mah puithiam sangbik pawl rori hman an ti sual pang a si ah cun ran thisen luan a tul tengteng mi hi a si. Bawipa in ngaithiam aw, ka ti sual a si, ti menin a rak ngah lo. Thisen kha a luan tengteng a ṭul. Asinan, ran thisen khan an sual pawl ngaidam asinak dingah kumkhat lawng a rak deih ṭheu. Cutikah kumtinin raithawinak an rak tuah. Ziangruangah kumtin ran thisen hmangin rai an rak thawi? Kumkhua a deih loh ruangah a si. Pathian lung kha a ti awi thei ngaingai lo tinak a si. Cutikah Amah Pathian sawnin ziang in tuahsak?
A fapa Zisuh in pe a si. Zisuh hi puithiam dinhmun le raithawinak ran dinhmunin a ra a si. Israel pawl hrangah sualnei minung puithiamin rai a thawisak hai ih, kan nih cu sualnei lo Zisuh in rai inthawisak a si. Israel pawl cun kumkhaw hrang sual ngaidamnak a tuah thei lo mi ramsa an hmang, kan nih kan puithiam cun Amah le amah ramsa dinhmun ah a run hmang awk ih hlei ah, kumkhawdaih ngaidamnak a run tuah a si (Heb 9:11-12). Israel puithiam pawl cun leitlun kut ih sakmi biakbuk ah rai an thawi, kan nih ih puithiam Zisuh cun, kut ih sak loh mi van ah Amai thisen rori in hlansak a si. Cule ziang a ti bet? Kumkhaw deih a ti a si. Kumkhua cun past, present le future a huam ttheh a si. Hebru 9:25-26 ih kan hmu vekin, Zisuh kha ran thisen hlantu puithiam pawl vekin kumtin biakbuk ah lut ttul loin vawikhat ah a tuah theh a ti. Tuah ttheh lo bang sehla ran thisen kumtin an hlan nawn sal vek khan Zisuh hi ra thi nawn ih amai thisen hlan nawn sal rero ding mi khi a si. Asinan, a voikhat hlan miin Pai lung kumkhaw daih a lungawiter tikah, hlan nawn rero a ṭul nawn lo nak san a si.
Mi tampi cun theithiam lo in, tuini tiangin an sual thlahsaktu dingah puithiam (priest) an nei lai. Kan nih pawl cun Zisuh Khrih, puithiam thabik kan nei a si. Na nitin nun ih na tuahsual mi pawl, tuahsual pang mi pawl ruangah ngaidam co lo ding vekin na ruat aw in na nun a lo buaiter maw? Zisuh in ngaidam na sinak dingah a thisen a lo hlansak zo a si. Bawipai hnenah a lo ngaidam zo ruangah lungawi thu sim mai aw. 1 John 1:9 ah cun, “kan sualnak pawl a hnenah kan phuang ih ngaidam kan dil asiah cun, in ngaidam dingin le kan fellonak pawl hmuahhmuah tlenfai dingin a ralring ringring a si, a ti. Khrih ih thisen voikhat hlannak cun, kan sualnak hmuahhmuah kumkhaw daih ngaidamnak a tuah hleiah, Pai thinhengnak sung ta tla in runsuak a si (Rom 5:9).
3. Thiam in cotertu cu Pathian a si (Rom 8:31-34 siar aw)
Adam a tluksiat ihsin misual tiih in hmu tu le Setan fa ih in hmu tu, thiam loh in cotertu kha Pathian hi a si. Khatlei zawng ih kan sim asilen kan Judge (Ta-ya-tu-gyi) a si. Court ih roreldan kan thei theh ko ding. Judge in “hi nu/pa cu thiam a co a si,” a ti hnuhnu cun, thildang rel a ngah nawn lo a si. Cubang tukin Zisuh Khrih ruangah Pathian ih thiamcoter mi kan si ve zo. Paul cun, “Pathian cu mi hmuahhmuah rundamtu a si, asinan a zumtu pawl rundamtu a si bik,” (1Tim 4:10) a ti. A par ih kan sim cio zo vekin, Khrih thihnak ruangah kan leiba thihnak pek tlak a si zo. Judge in a list ta leiba TICK a pek zo. “Thisen tellovin sual ngaidamnak a um lo,” titu Judge hnenah thisen hlan a si zo. TICK pek a si la la zo. Pathian hrangah in ngaidam lo theinak lamzin a um nawn lo. Cutikah thiam in co ter mi a si. Heb 10:17 ah cun, “An sualnak le palh-nak pawl hmuahhmuah ka mang nawn lo ding,” a ti a si. Thiam a lo cotertu cu zo a si? Amah Pathian rori hi a si.
Cui hleiah, zo si kan ukil (Advocate) in ṭuansak? Zisuh Khrih a si. Leitlun ukil pawl cu an case kaih mi ah an sung phah theu, asinan kan Ukil Zisuh cu nehtu a si. Pai (Judge) lung tawngtu a si (Lk 3:22 Nang ka fapa duh tak na si, na parah ka lung a awi). 1 John 2:1-2 ah cun, “Mi zokhalin thil a tihsual ah cun Pai hnen ih in simsak tu Khrih mifel kan nei a si, Amah cu kan mai sual thupha cawinak a si, kan mah hrang lawng hman siloin leitlun mi hmuahhmuah hrang ih sual thupha cawitu a si,” a ti. Hi tluk ukil tha leh rinum nei tu kan si. Zo in saw thiam loh lo co ter thei nawn ding? Thiam cotertu khal Pathiana si. Zo hmanin thiam loh a lo coter thei nawn lo a si. Cunah a si, Rom 8:1 ah, Khrih ih a um tu pawl hrangah thiam loh coternak a um nawn lo, a tinak san.
Kan sim mi pawl vun ruatsal sehla, sualman leiba, hell in thla theitu hrang pek fel a si zo, na nitin nunnak ih na tuahsual, tuah lo sual hrang pek fel a si zo. Mawh a lo puh tu Pathian, kan Judge in thiam a lo co ter zo. Na Ukil len Zisuh asi fawn. ZIANG RUANGAH HELLRAM TLAK NA TIH RERO LAI?
Hellram tlak theinak lamzin pakhat a um lai a si, cu cu ziang a si? John 3:18 ah cun hitin a ti, “Amah a zumtu cu thiam lo coter a si lo, asinain a zum lotu cu thiam lo coter in a um, Pathian ih Fapa neihsun hmin a zum lo ruangah,” a ti. Paul khal in, “Pathian cu mi hmuahhmuah rundamtu asinan, a zumtu pawl rundamtu a si,” a ti. Tuih kan sim mi in rundamnak thu pawl, thei cing keukeu ih zum duh lo nak kha, hell ram in thlentu ding cu a si. Thil ṭha na tuah thei ringring lo nak kha a si lo, na khawmthei ringring lo nak khal a si lo. Bible na siar thei ringring lo nak khal a si lo. Zisuh na zum duh lo nak, Judge in Khrih ruangih thiam in coter cia nak pawl na zum duh lo ruangah sawn a si ding.
Rundamnak hi zangfahnak ruangih Khrih zumnak ih ngah mi kan si. Hell ram tlak na tihnak na nei lai maw? Khrih in na leiba a lo peksak ṭheh zo, thiam a lo coter tu cu Pathian a si. Khrih cu na ukil a si. Zo in hell a lo thla nawn ding? A thutak kan sim mi kan zate parah Pathian in thlawsuah in pe hram seh. Amen.