Posts
Zumtu Khristian ti fam cu kan fa le Pathian thu an
thei ding hi kan laimi pawl cun kan duhbik mi a si. Kohhran ah siseh tlawngpit
caan a rung si cun Biakinn lamah nauhak crusade le a phunphun kan tuah. Pathian
thu tla kan mah le thei tawkin kan sim in, zindik an zawh ding kan duh hai zet.
Thil ṭha zet mi a si. Asinan kan fale pawl Pathian hminsal
ih nun kan sim dan thu ah ruah ding tampi kan nei. Tampi sungah a tangta pahnih
ka run tarlang ding.
1. “Na nu le pa thu na lung lo len hell ram na tla
ding/ vanram na kai lo ding”
Mi pakhat sim mi ka thei dah, “Leitlun ka nu le pa’i
thu hman ka lun loh cun vanram cu ziangtin ka kai ding,” a ti. Dik vek zet sisi
dik si lo zumnak a si. Kan Bible cun, “Nauhak pawl nan nu le nan pa upat uh,”
in ti. Nu le pa upat ding hi kan nih zumtu pawl hrangah cun thlun rori ding mi
a si. Asinan, vanram kainak le hell ram tlak-nak an si lo veve ti hi kan thei
cio ding a zum um. Van kainak cu Zisuh pakhat zumnak lawng hi a si ih,
cubangtukin hell ram tlaknak khal Zisuh pakhat zum duh loh-nak lawng hi a si
(John 3:18). Cuiruangah kan fale kan kawk tik ah si maw, nun kan sim caan ah si
maw, “Nunu le Papa thu na lung lo len vanram na kai lo ding,” ti mi ṭongkam
hi kan hman loh a ṭha bik a si. Cuhnakin, “Pathian in nu le pa thulung
lo le ṭihzah lo a duh lo,” ti’n ti sawn sehla a ṭha bik mi a si.
2. “Cutin na um lo len Pathian in a lo hrem ding”
Kan Bible pumhlum hi zoh sehla Pathian in a fale par
ih duhdawtnak a ngah zia le duhdawt lainattu Pathian a sizia kan hmu thei. A
fale hrangah ziang hman ui mi a nei lo ti tla kan thei. Asinan, kan fale hnen
ih Pathian mizia kan sim dan cu, nauhak ṭap lai bang seh ti kan duh ih “Kawlram
rapkap pawl an ra,” kan ti bang deuh khin, “Cutin na tuah lo len Pathian in a
lo hrem ding,” kan ti ṭheu. Pathian hi ṭihzah ding kan
si, asinan ṭih ding kan si lo. In duhdawttu, van ih a um mi kan
Pa a si. Tu cu kan fale thu kan sim dan a dik nawn lo tikah Pathian hi
duhdawttu hnakin mi hrem hmang le kan ral vek ah kan hmu thlang a si. A
duhdawtnak le a thlawsuah kan co mi pawl hi kan fale hnen ah sim tam sawn sehla
an thinhar mangbang caan ah pan ding dik Pathian an pan sawn ding a si.
Nu le pa’i duhdawtnak a theifiangtu fa pawl hin nu
le pa an ti riahse siang lo. Cuvekin Pathian duhdawtnak kan thei tam poh len a
thulun hi kan duh vivo sawn a si. Cuiruangah kan fale nun kan sim dan hi a
hleice in Pathian hmin kan sal ding asilen kan ralrin a ṭha
a si. Nu le pa pawl kan ralring ciau pei uh.