“JESUH THAWN NAN PEHZAWM-AW NGAINGAI MAW?”

Mizan cu Netflix ah rapture thuthawn a pehpar-aw deuh mi movie ka zoh, ka zoh mi ahcun pastor pakhat hi laksoh mi lak ah arak tel ngah lo. Cutik ah tlangval pakhat, laksoh ve lo mi cun, “Ziangah pastor na si fawn, laksoh lakah na tello,” tiah a sut. Pastor cun, “Biakinn nei le pastor ti mi title nei ruang ah laksoh lak ih tel ding tinak a silo, Jesuh thawn pehzawmawknak ka rak nei lo ruangah a si. Keimah ten ka hna arak ngam ih, ka rak nuam. Asinan Amah ka rak nei ngaingai lo,” tiah a sawn. An sawnawk mi in thu tampi in ruahter. Nangtla a lo ruahter ve nasa ding ka zum. 

Miphun dang cu kan sim lo ding ih, kan mah laimi lala hi zumtu kan ti-awk dan hi thaten vun ruat sehla, mah bulpak ih Jesuh a tawngtu, a neitu hnak in pi le pu, nu le pa Christian an si ruang ih zumtu, Christian ka si, ti aw kan tam sawn. Laimi si phawt cun Sunday ah si maw, khawm program nei tinten khawm ding ti hi kan thinlung ih kan neih mi a si. Khawi tawk hmun kan va um khale khawmnak ding hmun kan hawl, cutluk ih Pathian ngaina miphun kan si. Asinan kan ruah ding thupizet mi cu, ‘Pathian, Pathian’ kan ti rero lai ahhin movie sung ih pastor bang ih Amah Jesuh thawn pehzawmnak neilo tampi kan um ding a zum um. Ka sim sual asilo ahcun, punghman ih khawm kan nei theu mi le khawmnak ih kan tuah mi tam sawn hi ‘Pathian sunlawinak’ ding hnak in ‘milai kan thinlung diriamnak’ hrang le ‘mawi’ kan ti dan le ‘tha’ kan ti-dan sawn in kan feh tlang pi. Kan khawm dan ah ‘milai’ kan di a riam le Pathian a diriam/lungawi ding ah kan ruat. Kan ei lo zawng a sile ‘Pathian lungawi lo’ ding ah kan ruat lala. Kan mah le kan mah hi ‘Pathian’ ah kan ret aw sawn tlangpi. Kan laimi zumtu/Christian kan ti-awk dan le ‘Pathian kan thangthat’ kan ti mi hi kan ruah nawn a tul nasa. Kan tuah mi ziangtin kim ah Jesuh sunlawinak kan pe maw? Dan men in sawn saw kan feh ring ring? Kan suhawk nawn leuhleuh a tul a si.

Pathian a duhzettu le a Dan a ngaina zettu Farisai pawl nun kha kan vun zoh hnik ding. Pathian an tan dan le a dan pawl cu an thlun dan kha mangbangza a si. Tulai san si sehla pastor, senior pastor, Rev pawl tla an si ding. Mi rintlak le zahum ngai ngai an si Pathian thu lei ah. Asinan Jesuh in ziangtin a ti hai an biaknak kha, “Hi minungpawl cun an kaa thawn in ra naih ih, an hmur thawn in upat. Asinan an thinlung cu ka hnen ihsin a hlat zet. In biaknak cu alak a si. An thurin zirh mipawl tla cu minungih thupek men an si a ti,” (Mathai 15:8-9). 

Farisai pawl le Jesuh thu thawn pehpar in, Pathian zumtu, Christian ka si, punghman in ka khawm, ka pe, ka tuan, ti aw cing hin Jesuh thawn pehtlainak zianghman nei lo, dan men ih khawm le tuah, Jesuh neilotu, mah thin hnangamnak hrang le diriamnak hrang ih rak tuah rero tu zumtu ti aw si arak awlte. Cuvek kan si pang maw? Kei tla ka si caan tampi a um. 

Zumtu a ti aw tu nu le pa, fala le tlangval, mino pawl, ‘zumtu/Christian’ a si ngaingai mi ‘Jesuh thawn a pehtlaih aw tu’ zumtu na si ngaingai maw? Pastor pa bang khin biakinn ih khawm punghman le sinak title le tuan zuamnak, peknak le a hmin ih Chrstian sinak pawl in a lo luatter thei lo. Amah Jesuh thawn nan pehzawm-awk a tul a si. 

“Amah Pathian ruangah nannih cu Khrih Jesuh ah nan um. Khrih cu Pathian hnen ihsin kan hrangah fimnak, dingfelnak, thianghlimnak le tlensalnak ih tuah a si.” 1 Korinth 1:30