HOSANNA SULLAM ZIANG A SI?

Kawhhran hrekkhat cun tuini vek hi Palm Sunday tiah ni hleice vek in an hmang theu. A hrek cun Sunday hmankel in an hmang. Pathian thangthatnak ah hi ni an hmang veve ih a lungawi um. Tuini ih kan topic ding cu, “Hosanna” tiih kan aupi theu mi, Pathian thangthatnak tongkam vek ih kan ruat theu mi tongfang sullam ziang a si, ti hi a si.

Palm Sunday a hmangtu kawhhran cun Sunday zing ihsin nauhak pawl thawn lamzin ah tumkau hnah thawn “Hosanna” tiah au in lam an rak zawh theu. An au mi ih a san ziang a si timi le Jesuh san ah teh ziang ruangah an rak au timi cu an ruat in an thei lem lo ding. Denomination hrek khat tuahdan kel a si ruang ah tuah ding ta rori ih ruat ih, mi burpi thlun ih tuah ve mai tla an um. Hrekhat kawhhran cun tu san ah ”Hosanna” tiih au pi rero ding asi lo, tiah palm Sunday cu Sunday kel vek in an hmang. Ziangruang a si pei? “Hosanna” tiih Israel pawl an rak au san teh ziang a si pei?

“Hosanna” timi tongfang hi Hebrew tong ihsi ra mi a siih, “in runsuak hram aw” tiih zangfah dilnak a si. Israel mipi pawl khan Jesuh kha an Messiah, an mah rundam theitu asinak an pawm nan, an ni rak beisei dan cun thlarau lam rundamtu silo in, political siangpahrang, David bang siangpahrang ah ruat ta hrat in Jerusalem a luh zik ah an rak lawm in, an rak hmuahnak au aw a si (Mt 21:9). Khalai san ah Israel pawl kha Rome cozah kut tang ah an um ih, cui kuttang ihsin Messiah in rundam ih lei taksa Lalram din ding vek ih an rak ruat a si. Israel mipi pawl in an rak au dan bik cu, “David ih fapa, Rome uknak sung ihsin in runsuak hram aw” ti hi a si.

Thlarau lam zawng ih kan zoh asile Jesuh in AD 30 hrawng ah kumkhaw hrang in rundam zo. Tuini ah “I rundam aw” tiih au rero ding silo in, in rundam cia zonak thinlung ih rak cohlang ding mi hi milai ih kan tuahthei um sun a si. Cule in rundamzo ruang ih amah thangthat ding hi kan rak si sawn.

Nang le na sung pawl teh Palm Sunday niah “I rundam hram aw” tin nan au rero ding maw? Alo rundamcia zonak cohlang in Amah nan thangthat ding?