Jesuh cu Pa’i Hnen Thlennak Lamzin A Si

Jesuh zumtu a ti aw mi pohpoh in vanram timi Pathian umnak inn thlen kan duh ciau. Thlen tla kan tum ciau. Biakinn ih kan zirterawknak khal ah sungkua ih van thleng lo ding a ttih umzia kan sim uar zet. Asinan vanram kai kan tumdan a bangaw ciau lo. A hrek in mai thiltha tuahnak ih kai an tum lai ah a hrek cu dan thlunnak le sual sirnak in kai kan tum. Mihrek in tidai baptima co cem ih kai an tum lai ah, a hrek cun Bawipa’i zanriah ei cem in kai kan tum. Ruahtheinak nei ih sersiam mi milai cun zumdan a phunphun kan nei. Bible sung ih um ve theh mi le an si fawn, khawruahharza  ngaingai a si.

Khawitawk hmun kan fehzik asikhale kan tul mi cu lamzin a si. Tulai san ahcun GPS (phone sung ta lamzin zoh awlnak) hi kan feh duhnak hmun in hruaitu a si. Cuvek thotho in Pathian umnak inn, vanram khal in lamzin a nei ve. Cui lamzin ihsin kan feh lawng ah vanram thlengthei ding kan si. Tui san zumtu ti aw pawl cun lamzin dangdang kan neiih, kan mah le zum dan ciau in kan feh, kan zuam, asinan a dikmi lamzin pakhat lawng a um. Cucu kan Bible in hitin in sim.

Jesuh in a dungthluntu pawl hnen ah, “Van ah ka Pa in room tampi a nei. Nei hlah sehla hi thu pawl hi ka lo sim lo ding. Keimah tla cui hmun ih ka feh ding thu le nan hrang hmun ka rem ding thu ka lo sim lo ding,” a ti hai. Jesuh in a pehsal ih, “Ka fehnak ding LAMZIN cu nan thei a si” a ti. Cutik ah Thomas in, “Bawipa, na fehnak ding hmun le kan thei lo, ziangtin cui lamzin cu kan thei ding,” tiah a sut. Cutik ah Jesuh in, “Keimah cu LAMZIN le THUTAK le NUNNAK ka si. Keimah ihsin feh lo zohman ka Pa hnen an thleng thei lo,” a ti (Jn 14:2-6). Vanram, Pathian umnak LAMZIN cu a fiang nasa. Lamzin dang a um lo, JESUH lawng a si. Jesuh lawng hi Pa’i hnen thlennak LAMZIN a si.

Jesuh cu LAMZIN a si ti kan thei ko nan, ziangtin vanram inthlen pi ding ti thei lo tampi kan um. Kan mahten lamzin dang kan tuah ih, vanram thlen kan tum ciamco thotho. Jesuh in “Keimah ihsi feh lo cu Pa’i hnen an thleng thei lo” a ti tikah a tuah mi vek ziangtin kim tuah fel ve theh ih vanram lut ding kha a sim duh mi a si lo. Sisehla milai kan fel famkim thei ih, kan tuahnak in van kan thlengthei tinak a si ding. Amah Jesuh a rat tulnak san tla a um lo ding (Gal 2:21). Jesuh ih a sim duh mi sawn cu, vanram neitu Pathian milai(misual) par ih a lungawinak hrang in tuahsak mi hmuahhmuah, sual ngaidam raithawknak in tuahsak mi pawl, kan leiba thihnak in pektlaksak theh mi pawl, kan mahte ih tuahthei lo mi intuahsak mi pawl “ring” ih van kai ding mi kan sinak sawn a si. A tawi famkimbik ih kan sim asile, “Amah Jesuh ZUM” hi a si (Jn 3:16). 

Thuthangtha ti ih kan sim rero mi tla hi ziangdang a si lo, Khrih ih in aiawhsaknak pawl, in rundamnak thu hi a si. Van na kai theinak ding ah ziang mi lamzin na zawh? Ziangmi lamzin na tuah cawp? Kan vankai tumnak lamzin kan zawh mi hi Jesuh a si maw? Pa’i hnen thlennak lamzin pakhat lawng a um. Cucu JESUH a si. JESUH ZUM HI A SI.