ZIANGRUANGAH KAN PIANTHAR A ṬUL?

Milai a simi hmuahhmuah cu kan lei taksa nun a cem hlan ih rundam/piantharnak kan co ṭheh a ṭul. Ziangahtile kan thihhnu cun Lazaras le milianpa bangin ziangkim an fehnak ding hmun ah an feh thlang ding ruangah a si.

👉 Ziangruangah kan damlai ah kan pianthar a ṭul?

1. Hell a um ruang ah (Mt 25:41)

2. Kumkhua a nung mi thlarau kan nei ruangah (Gen 2:7)

Hi mi pahnih a um ti kan thei cing ih piantharnak kan co hrih lo asiahcun, a tu hi caan ṭha kan neihlai fang a si. Covid-19 hnak ih ṭih a nung sawn mi cu kumkhaw hell ih um ding mi hi a si. Na taksa, ka taksa cu vutcam ih cangsal men ding mi an si. Nangmah ngaingai a si sawn mi na thlarau kha kumkhua ih a nung ding mi cu a si. Tunitiang dam cak zet ih na umnak san hi, ziangdang asilo, Pathian in caan ṭha a lo pek lai ruangah sawn a si (2Pet 3:9). Caan ṭha insan mi hi kan hmangthiam lo ding a phan um nasa! Lehhnu ahcun a tlai ding ih sirawk in umzia a nei nawn lo ding.

👉Asinan, ziangtin kan piangthar thei ding? Ziangtin rundamnak cu kan co thei ve ding? timi hi mi tampi ih ruahbuai mi a si ṭheu.

👉    Mi hrek cun, “Miburpi in thilṭha le mawi a timi dan le dun a tuah mi pawl a thlun ah cun, ṭha tuk le feltuk ah a ruat aw ṭheu. Cule piangthar ah a ruat aw ih hnangam ten a um men.”

👉    Mi hrek lala cun, “Amah minung sinak ah miṭha ve hrimhrim a si tikah, hi hleihluan piantharnak a um cuang lo,” a tiih a hna a ngam men!


👉A hrekkhat lala cu, “Piangthar, rundam fa ka si zo ti thei fiangnak nei ngaingai loin piangthar vekin a um aw ter ih, sunglamah hnangamnak nei loin a thupten ṭihphannak thawn an khat.”

👉A hrekkhat lala pawl len, “Miburpi in ṭha lo a timi pawl an tuah ṭheu tuk tikah mah le mah misual ih ruahnak thawn khat in, rundam kha si tlak lole, Pathian khal ih ngaidam thei loh ding ah an ruat aw lala.” Mi buaithlak kan va si tak em!

🙏Bible in a sim mi piantharnak cu ziang a si?

2Kor 5:17 “Mi zokhal Khrih sungah a um ah cun, mithar a si. Thil hlun hmuahhmuah cu an cem zo, ngaihnik an thar ṭheh zo a si.”

Piantharnak hi har tuk ah kan ruat ṭheu! A dik ngai! Kan theihthiam loh mi le kan theih loh mi thil cu awltuk si hmansehla an har tuk ngai. Kan Bible cun, “Mi zokhal Khrih sungah a um cun, mithar, piangthar, rundam a si,” a ti a si. Nova lawng kiang ih um le tlanlen kha rundam sinak asilo. A sung rori ih um kha tilian lak ihsi rundam sinak a si. Jesuh sungah um ngaingai siloin a kiangkap vel ih vak kual rero kan si pang ding ti a phan um nasa!

👉Thu suhnak cu hihi a si, “Ziangtin Khrih ah kan um ding?” A tawizawngin kan simfiang ding.

❤️Kolosa 1:13 ahcun, “Pathian in thim thuneihnak(Satan) ram ihsin in runsuak ih a Fapa Jesuh ih uknak ram ah in ret zo a si,” a ti.

💛1 Korin 1:30a ahcun,”Amai ruangah nan nih cu Khrih sungah nan um a si,” a ti lala.

💚A netnak bikah, Kolosa 3:3 ahcun, “Nan nunnak ngaingai cu Khrih sungah thuhin a um zo a si,” a ti a si.

Pathian in khawiah a lo ret zo? Na thinlungin vun sang hnik aw….! Jesuh Khrih sungah a si. Zokhal Khrih sungih a umtu cu ziang a ti? Mithar/Piangthar an si a ti. Pianthar na rak tum dan le Bible ih a sim dan hi a rak pial aw nasa maw? Nang cun na ṭhat deuh caan lawngah piangthar ah na ruat aw theu si lo maw? Na fel lo ih na ruatawk caan ah piangthar sal lo, hell tla ding vekin na rak ruat aw ṭheu si lo maw? Hi bang pawl cu minung ih kan ruahnak men an si. Kan Bible cun Khrih sung ih a umtu cu mi piangthar/ mithar tiah a ko a si.

Khrih fehtlang ih Pathian ih in rundam zonak le Khrih sungah in rak retcia zonak pawl hmuahhmuah hi kan rak cohlan tikah a tak in kan mai hrang ah an ra cang ṭheh a si. Cuiruangah Paul cun Timothy hnen ah, “Pathian cu mi hmuahhmuah rundamtu a si, A ZUMTU hmuahhmuah RUNDAMTU a si bik,” a ti a si (1Tim 4:11).

Bible in a lo rundamcia zonak pawl a lo sim mi, na thei ih na cohlang, na zum asiahcun, rundam fa, piangthar, kumkhaw nunnak neitu, Pathian ro cotu cu na si. Hell ihsin khalin na luat zo fawn a si. Pathian in thlawsuah lo pe hram seh! Amen! 🙏