NGAIDAMAWKNAK

Bible: “Khrih sungin Pathian in a lo ngaidam bangin pakhat le pakhat ngaidam aw uh.” (Efi 4:32)

“Ngaidamawknak” timi hi ziang a si? Tuah sual mi ruang ih dan tatnak ihsin ngaidam, lole cawhkuanter lo, tinak a si. Cozah dan vek asiahcun, mawhnak le palhnak zaten cayin ihsin hlawn hlohsak, lole mawhnak pawl mangsak nawn lo, tinak a si.

Pathian in Jesuh Khrih thisen ruang ih in ngaidam tikah ziangtin a ti? “An sualnak le an siatnak pawl ka cing nawn lo ding,” a ti a si (Heb 10:17). Ngaidamawknak diktak cu Pathian in Khrih sungih in ngaidam mi vek hi a si. Khrih ah nang cu na sualnak zate thawn ngaidam na si zo, kan si theh zo. Na palhnak le na mawhnak pawl a lo cingsak nawn lo ih, a lo ngaidam theh vuarvi zo a si. Minung lam ih kan tlin ruang le that ve-nak zianghman a tello, Amah le Amah ruang ih in ngaidam le in rundam sawn mi a si. Cucu atakin kan nun ah kan hmangsuak ding tla Pathian in a duh zet a si. Asinan,

Minung cun kan par ih thiltha lo a tuahtu le in thin-nat-ter-tu hi kan hngilh thei dah lo. Ka ngaidam zo, kan ti mi khal kan sung thup ah an rak tanglai ringring theu. Zumtu pakhat dinhmun khalin midang ngaidam hi harsa kan ti zet mi cu a si. Kei tla har fualfo ka ti ve mi a si. Ziangahtile, kan thinnatnak lai fangte kha kan mangsuak cingcing ruangah a si.

Midang kan ngaidam theilo tikah kan mahah ziang a cang?

1.     Thinheng in kan um

2.     Lung a awi thei lo

3.     Mithmai a siat theh

4.     Kan kiangkap umtu hrang tuar a har

5.     Kan mah khal kan dam thei lo

6.     Phurrit phur kan bang

7.     Kan caan tha in lawnsak

8.     Thin a bang

Tampi rel ding a um a si. Ngaidamnak thinlung a neilotu hrangah cun nun hi a kha fualfo a si. Mah le mah hman a ngeihawk lo caan a tam a si. Zangfak umza za a si.

Paul in, “Pathian in Khrih ih a lo ngaidam vekin ngaidam aw ve uh,” a ti tikah pawngpaw ngaidamnak a sim tum mi a si lo. Cu vek cu minung dinhmun in a ngah lo ti a thei ve a si. Khrih sungih a lo ngaidam vekin, a ti kher a si. Khrih sungih ngaidam kan si dan ciau hi vun ruatsal sehla, midang ngaidam theilonak ding san a um kem? Ziangvek dinhmun ih kan umlai ah Pathian in inrak ngaidam.........?Nangmah a lo ngaidam vekin midang tla kha a ngaidam ve a si. Cuvek thu pawl ruatsal thiam ih kan um asilen, kan hrangah midang ngaidam a har nawn lo ding a si. Kan ngaidam thei thlang ding a si. Cule kan nun tla a hahdam ding.

Hi mi thuah kan theih tulmi pakhat cu, “Midang ngaidam lawng a si lo, nangmah le nangmah tla na ngaidamawk kha a duh mi a si”. Minung hin thil tuah kan duh loh mi tuah sual pang le ngaidam theiawk loh-nak thinlung, mah le mah huatawnak thinlung tiang nei kan um theu. Pathian in Khrih ah a lo ngaidam zo ih na sualnak pawl a lo hngilhsak zo ruangah, “Nangmah le nangmah tla ngaidam aw ve aw.” Ziangahtile, Pathian in Khrih ah a lo ngaidam zo ruangah a si. Midang na ngaidam lawng siloin, nangmah le nangmah na ngaidamawk tla a duh a si. 

Zumtu pawl hi leitlun khalah nun hahdam le zalen zet ih kan um hi Pathian in in duh. Nun hahdam ka ti tikah harsatnak kan tawng lo ding tinak a si lo. Paul cun, a dunglam ih thil feh cia zo mi a nun hlun kha a tui sun nun ah a kenglut in a ruatbuaiawk ter nawn lo a si. A hmailam nun sawn a thlir ih a thatheibik in a caan a hmang sawn a si. Cucu Pathian in kan umdan ding ih a duh ve mi a si. Kan thlarau hrang damnak asilo mi midang huatnak le mah le mah huatawknak pawl phurrit phur rero ding kan si lo. Cucu kan umnak ding ah Pathian ih duhmi a si lo. 

Pathian in Khrih sungih in ngaidam vekih, “Ngaidamawknak” thinlung kan neih ciau theinak dingah Pathian in kan zaten in thlawsuah hram seh! Amen!