Posts
Bible: Efisa 2:1-10
Easter Sunday cibai, nan dam
tlang ciau ding ka zum. Tutum khalah Efisa 2:1-10 ihsin rundamnak thu le zumtu
nun simnak kan nei ding.
Efisa 2:1-3 kan zoh tikah, Adam
ihsin kan co mi minung sinak kan hmu thei. Cui minung hlun cu sual ah a tlangleng
ih sual tuah tla nuam ti zet mi a si. Kan tong theu mi, “Ka pianthar hlan ih
sual tuah kha cu a nuam lawlaw, zu tla kha a thlum cuang,” kan ti theu vek kha
a si. Khakha kan minung hlun mizia a siih, sual sal ih tang mi milai nunnak a
si. Tisa caknak ih a hruainak hmuh ah thlun rero kha a si ko. Cucu kan dinhmun
a rak si hlei ah, Pathian thawn then aw vuarvi kan rak si. Pathian thawn a then
aw mi kan si tikah, kan thi hnu fehnak ding khal hell a rak si ziar. Kan nih
cun kan rak thei lo. Van kai ding ah kan rak ruat aw ringring theu. Zangfak za
kan si.
Efisa 2:4-5 kan zoh asile, Pathian
in sual sal ih atang mi milai pawl le sual in a duhduh ih a hrual kual rero mi
milai pawl cu in zangfak tuk thu kan hmu. Kan dinhmun se tuk a hmuh tikah a zoh
men thei lo ih, kan hrangah rundamnak in tuahsak. Misual kan si lai rori ah
Khrih sungah in ret ih, cutin minung hlun cu Khrih rualah Kross parah in that
cih lawlaw. Nunthar kan neih theinak dingah a si.
Efisa 2:6-7 Kan zoh asilen,
Pathian ih zangfah lainatnak nasatak ih kan par ih a tih lan mi kan hmu a si. “Khrih
ah cun amai thawhsal rual ah in kaitho ve ih, amah thawn van hmun ah in toter a
si,” a ti. Ava sunglawi ve! Kan dinhmun hlun kha vun ruatsal sehla, sualsal ih
tang, sual ih a duhduh ih ahrual rero
mi, hell tla ding mi rori kha Khrih thawhsalnak thawngin van khua le ti sinak
dinhmun in pe ta riai. Hell ihsin luatnak in pek hlei ah, sual sal ihsin
luatnak in pe fawn a si. Cule, kan ruat dah maw ka thei lo, “Van hmun ah amah
thawn in toter ZO,” a ti a si. Thil thlengcia zo mi simnak a si. A tu rori
khalah Khrih hnenah kan nunnak cu a um zo a si. Taksa in lei ah kan um lai ko
nan, kan nunnak ngaingai cu Khrih hnenah a um zo a si. Rapture si maw, thihnak
si maw thleng hmansehla, kan phang nawn lo, kan nunnak Jesuh hnen ah a um zo
ruangah a si.
Efisa 2:8-9 kan zoh asilen, a par
ih Pathian in Jesuh hmang ih in rundamnak pawl le van mi sinak, Khrih hnen ih a
to zo tu kan sinak pawl hmuahhmuah kha, “kan mai taimaknak ruang le hnatuan tha
tuan ruang ih kan co mi asilo zia,” in sim a si. “Pathian zangfahnak ruang ih
zumnak ih nan co mi a si,” a ti a si. Pathian ih laksawng rori sawn a rak si.
Cuiruangah na tuah that caan ih van kai, that loh caan ih kai sal lo tivek kha
a rak si lo. Pathian ih laksawng sawn a rak si.
Efisa 2:10 kan zoh asile, Khrih a
zumtu, a thawhrual ih a tho ve zotu, van hmun ih amai hnen ih a to ve zotu pawl
cu sual sal si nawn loin, zalen kan si thlang ruangah, sual ih hrual rero theih
kan si nawn lo zia kan hmu. Cule Khrih ah in sersiam thar tikah, thiltha tuah ding
hrimhrim ih hrintharsal mi kan si. Curuangah zumtu cun thiltha tuah hi a ning
ding a si lo, ti a si. Ziangahtile, cucu Pathian hmel kan mawiter theinak le
kan nun ih a mizia a lan theinak umsun a si ruangah a si. Fa sual maw kan si
ding? Fa fel le tha? Peter cun, “Nan zalennak cu sual tuahnak ah siloin,
Pathian sal sinak ah hmang sawn uh,” a rak ti a si (1Pet 2:16). Khrih rual ih
kaihthawh a si zo mi nunnak theifiangtu cun a tuah ding mi a theithiam zo a si.
Awle, simcia zo vekin, sual sal
ih atang mi, hell a tla ding mi nang le kei cu Pathian ih zangfahnak ruangah
Khrih sungah ret siin, thihnak ihsin thawhter a si rual ah thawhter ve kan si.
Van hmun ah Amai hnenah toter ve zo mi khal kan si. Cucu kan thiltha tuah ruang
si loin, Pathian laksawng a siih, zumnak in kan rak co ve a si. Khrih rual ih
nunthar ih a thotu pawl cu kan nitin nunah Pathian hmel ti mawitertu ding ih
sersiam mi khal kan si. Pathian in a thu hmangin lo thlawsuah hram seh! Amen.
No comments:
Post a Comment