JESUH IN “A KIM THEH ZO,” A TI TIKAH ZIANG A SIM DUH?

Good Friday a sivek in, Jesuh Kross par ih a au mi pasarih lak in pakhat a si mi, “A kim theh zo,” timi ihsin thazang lak kan tum ciau ding. Kan theihcia zo vekin Jesuh cu leitlun mi hmuahhmuah ai-awh in Kross parah an khengbet. A thih hlan te-ah “A Kim Theh Zo,” ti’n a au ih cule a thaw a cem. Mirang cun, “It is finished,” (Jn 19:30) ti a si. Greek tongfang, “tetelestai” timi ihsin ra mi a siih, a sullam cu, “A zaten pek theh zo” lole “Leiba a zaten pek theh zo,” tinak a si. Jesuh in ziangruangah cutin a tong si pei?    

1.     Sualman leiba kan neih mi in pek thehsak zo ruangah (Rom 6:23)

Kan Bible sung ih kan hmuh bangin Pathian in, “Sualman cu thihnak a si,” a ti. Zumtu a silo mi le piangthar lo mi cu rel hrih hlah, zumtu a si cia zo rori hman Johan in, “Sual ka nei lo kan ti ahcun mah le mah bum aw kan si,” a rak ti (1Jn 1:8). Rom 3:10 kan zoh asilen, “Zohman mifel an um lo,” in ti a si. Cui sual nei pawl ih leiba cu “thih” a si. Misual a thilen khawi ah a feh ding? Hell ah a si. Minung in a leiba pe ding cun hell a tla ding fawn, runsuahawk salnak a um nawn lo a si. Cutikah amah hrang ai-awhtu a tulnak san khal a si. Baptist Johan cun Jesuh a hmuh tikah, “Zoh hnik uh, Pathian tuu fano, leitlun sual phurtu khi,” a ti a si (Jn 1:29). Leitlun mi hmuahhmuah sual cu Jesuh parah Pathian in a thum tikah, camsiat mi bangin Kross parah a thihnak a si. Jesuh a thi tikah, na leiba, ka leiba a si mi, sualman thihnak cu Pa hnen ah pek theh a si. Cutikah nang le kei cu thihnak leiba nei nawn lo ih siar kan si (2Kor 5:14b), umzia cu meidil tlaknak lak ihsin luat ter zo mi kan si tinak a si. Ziangahtile Amah Jesuh rori in, Kross parah, “Pek theh a si zo,” a ti a si. Khrih thihnak thawngin “Ka sualman leiba ka pe theh zo,” ti theinak kan nei ve a si.

2.     Dan thluntheilo ruang ih camsiatnak ihsin in luatter ruangah (Gal 3:13)

Kan Bible tarlan miih kan hmuh mi cu, “Khrih cu kan ai-ah camsiat a tuar,” a ti. Ziangruangahtile, a parlam kan zoh ah cun, “Dan cabu sungih a ngan aw mi thlun theilo tu cu camsiat an si,” a ti a si. Cui dan thlun theilo pawl ih co vo cu camsiat mi an si hlei ah thing parih khai thah hi a si. Dan hi a cipciar in 613 a um, cumi zate kha peih tik can ih thlun ih peih lo can ih thlun sal lo ti vek a ngah lo, nitin zantin, second tin ih thlun ding mi a si. “Na thlun thei maw?” James cun, “Zo khalin dan thlun thei theh hmansehla pakhat ah a ti sual cun, a zate ih thlun thei lo thawn a bangaw,” a ti a si (James 2:10). Kan luat lo nasa. Camsiat mi, thi ding mi, kan rak si ziar a si. Asinan Bible ih in sim vekin, Jesuh cu kan ai-awh in camsiat a tuar ih, Kross parah a thi a si. Cutikah kan par ih a um mi camsiatnak pawl hmuahhmuah cu Khrih ruangah lak hloh theh in a um. Pathian ih camsiatnak lawng silo, minung pawl ih an lo camsiatnak tiangin a lo lak hlohsak zo a si. Jesuh in Kross parah, “Pek theh a si zo,” a ti tikah, nang cu “camsiatnak lak ihsin rundam na siih, camsiat mi si nawn loin, MI TLAWSUAK na si zo,” tinak a si. Ava ropi so!

3.     Sual sal ihsin in luatter zo ruangah (Rom 6:18)

Adam ih thulun lo ruangah mi hmuahhmuah cu sual sal ah kan tang ih, kan ra suah ve ten sual sal si cia in kan ra suak. Cutikah sual tuah hi zir tul loin kan thiam cih ih, kan khawruahnak le kan zan manglam tiangin thil sual kan tuah theu a si. Sual sal kan si ruangah sual tuah lo ih kan um theilonak khal a si. Piangthar lo in sual a tuah tikah, a tuah dingmi diktak a tuah sawn hi a rak si. A fel tuk, tiih kawh lam ding. Ziangahtile sual sal a simi ih tuah ding hrimhrim a rak si. Asinan sual sal ih atang mi hmuahhmuah cu Pathian in Jesuh sungah a ret ih, cule Kross parah amah thawn a that cih ve. Cutikah sual sal ih atang mi pawl cu an thi theh. Mithi zo parah cozah dan in thuneihnak a neih nawn loh bangin Jesuh rual ih a thitu pawl parah sual in thuneihnak a nei nawn lo a si. Setan in thuneihnak an par ah a nei nawn lo a si. Mi zalen an si zo a si. Nang le kei khal Jesuh ruangah sual sal si nawn loin miluat kan si zo. Sual hi tuah lo khalin kan um thei thlang tinak a si. Zumtu, miluat asi zonak theifiangtu hrangah cun, “ka thlah thei lo si lawm,” ti hi a um ve nawn lo. A duh le duh lo a si sawn thlang. Ziangahtile Jesuh in Kross parah a nun liamin a rak pek fel theh zo ruangah a si.

Awle, Khrih in thinglamtah parah, “Pek fel theh a si zo,” tiih a au tikah, nang le kei cu sualman leiba thihnak ihsin in luatter ih, hell ihsin luatnak in pe. Dan thluntheilo ruangih camsiatnak kan par ih um mi pawl khal lak hloh thehsak kan si hleiah, “MI THLAWSUAK” in si ter. Cule sual in a duhduh ih a hrem kual zawk rero mi dinhmun ihsin miluat, mi zalen khal in si ter zo a si. Khrih thihnak ruang ih kan sinak thar pawl thei ih a tak ih mai nunnak ih hmangsuak tu kan si ciau nak dingah Pathian in thlawsuah in pe hram seh! Amen!