EASTER TIMI CU ZIANG A SI?

  

                

             EASTER timi cu ziang a si? Sunday zing ih Sabek (Bunny) tumpi in arti le chocolate mawi zetzet a ceimawi mi hi an si maw? Si lo! Cubang cu thuanthu an tuah mi men a si. EASTER tinak an si lo.

      

EASTER timi cu ziang a si ding? Ziangruangah EASTER SUNDAY tla kan lawm?

                      

     

                   

Minung hmaisabik a si mi Adam le Evi cun Pathian thu an rak lung lo. Setan thu an rak lung sawn ruangah Pathian kiangah an um thei nawn lo. Pathian cu a thin a na ngaingai. Ziangahtile a duhdawtzet miin a thu an lung lo ruangah a si.

Adam le Evi cu Eden hmuansung ihsin dawisuah an si hnuah a tu kan umnak leilungpi ah an rak um. Cule fate tampi an nei. Nang le kei tla kan ra suak ve a si. Asinan Pathian thawn kan um tlang thei nawn lo.

            
     
                     

Adam te nupa in Pathian thu an ngai lo ruang ah mi hmuahhmuah kan sual theh. Thil thalo tla kan tuah. Mi kan thawi ih kan to theu. Nu le Pa thu tla kan lung lo. Unau tla kan duhdawt aw lo. Kan thinlung tla a sual theh zo a si.

                                
                             

      

  Adam ih tefa a si mi milai pawl cu hell an feh theh ding a si. Ziangahtile Adam le Evi in Setan thu an rak lung sawn ruangah a si.                                           

                          

       Asinan Pathian in milai pawl hi in duhdawt ringring. Hell kan feh ding a siang lo. Amah thawn vanram ih kan um ding a duh a si.

                      

Pathian in milai pawl hell kan feh a siang lo tuk ruangah A Fapa Jesuh cu leitlun ah a run thlah. Hell ram ihsin in rundam ding ah a si. Culawng si lo, kan sualnak hmuahhmuah ngaidam a sinak ding hrang tla a si. 

                                  

Sualnak le mawhnak neilo Jesuh cu kan mah ruangah thinglamtah parah an that. Nang le kei hell ram ihsin in runsuak duh ruangah a si. 
                        

Jesuh cu a thi hnuah thlan sungah an phum. Jesuh ih ruak kha an fir pang ding ti an phang ruangah Rom ralkap pawl in a thlan cu an kil ciam co. Asinan Jesuh cu nithum ni, Sunday zing ah thihnak neh in a thosal a si.

                                        

                        

                           

Sunday zing pit a hung si tikah Mary le a rualpi pawl cu Jesuh thlan ah an feh. Jesuh kha thlan sungah a thi rero laiah an ruat. Thlan an thlen tikah thlan sangka kha a rak ongawk tikah an mangbang ngaingai. “Zo in kan Bawipa Jesuh a fir si pei?” an ti zawk rero. 

                       

 Riahsia le thinbang ih an um rero lai ah Bawipa’i vancungmi a ra lang puppi. Mary le a rualpi pawl cun an tih tuk! Asinan Bawipa’i vancungmi cun, “Tih hlah uh, thinglamtah parih an thah mi Jesuh cu a thosalzo a si,” a rak ti hai. Mary le a rualpi pawl cu an lungawi ngaingai. Ziangahtile Bawipa Jesuh kha thihnak nehin a thosal zo ruangah a si.  

                       

Kan nih tla Jesuh a thosal ruangah lungawi ve ding kan si. Ziangahtile, a thosal ruangah hell ram ihsin kan luat theinak a si. Jesuh a thosal ruangah Pathian in kan sualnak zaten in ngaidam zo a si. 

Jesuh thihnak neh ih a thosal ni hi EASTER tiih an rak kawh mi cu a si. Jesuh cu Sunday zingah a thosal ruangah “EASTER SUNDAY” tiih kan hmannak san tla a si. EASTER hi Sabek(bunny) in arti a ceimawi caan a si lo. Rundam kan sinak ding hrang Jesuh thihnak nehih a thosal caan sawn a si.   

                                   

          

                       

THUSUHNAK

 1. Sabek (Bunny/Rabbit) le arti ceimawi hi Easter a si maw?

2. Easter cu ziang a si?

3. Easter Sunday ni ziangah kan lawm?

4. Jesuh a thi ih a thosal ruangah ziang ihsin luatnak kan co?

5. Jesuh a thosal ruangah zo in kan sualnak hmuahhmuah in ngaidam?

6. Na rualpi hnenah Easter timi ih sullam na simfiang thiam pei maw? Ziangtin na sim ding?