VANRAM KAI THEINAK PATHIAN DUHZAWNG TUAHTU ZO AN SI?

Bible verse: “Bawipa, Bawipa,” tiih I kotu pohpoh in vancung uknak an thleng thluh lo ding; vancung ih a ummi ka Pa ih duhnak a tuahtu lawnglawng an thleng ding a si.” (Mathai 7:21)

Leitlun ah a nungmi Pathian a betu cu kan mah Khrihtian le Juda pawl lawng kan si. Vanram kai ding thuah a neitu Amah Pathian hman be lotu hrangah cun kai theinak lamzin a hla sinsin. Kan Bible tarlan mi kan zoh asilen Khrihtian a ti aw mi lakah a phunphun kan um ti a fiang. “Bawipa, Bawipa,” tiin kan ko cio konan vanram kai ding kan si theh lo tinak a si. Asilen…

Zo pawlin “Bawipa, Bawipa,” tiah an ko?

1. Pi le Pu Khrihtian si ruang ih a hmin ih Khrihtian si pawl

Hi pawl hin Khrihtian kan si cu an ti aw ve konan, kohhran lam hnatuannak ah lang dah lem lo, khawm kha khawm dah lo, Bible kha siar dah lo le Pathian thu kha ngaihsak lo pawl an si. An kaa cun Pathian hi “Bawipa, Bawipa,” tiah an ko ve thotho. Khrihtian tiawk ding hman hi an phur tuk loh caan tla a um theu. Pumpak zalennak ram ih a um pawl tla cu Khrihtian sinak ihsin biaknak neilo dinhmun tiang an si phah a si. Na rak si ve ziar maw? 

2. Sakhaw mi tha Khrihtian pawl

Hi pawl ve thung cu minung danah an sinak hrimhrim hi mifel le taima, pe aw thei tuk le roreldan kha thiam emem pawl an si theu. Kohhran hnatuannak le biaknak lam hrang a tul mi a si phawt cun an ziang kha pek an siang. Zuk le hmuam khal ah an fihlim tlangpi. Hi ti zoh men khalah minung danah cun piangthar lawlaw an si. An nih hnak ih piangthar dang an um thei nawn lo ding ti ding khawp ih mifel le tlawmngai thei an si. Mi fak le tihzah le lawm hlawh an si. Pathian tla hi an mai ta bik le an Pa si bik ding hi a bang. Asinan, Pathian mithmuh ah cun a parih kan sim mi pawl thawn bangawrep an si. Zumlotu thawn a bangaw mi an si. Ziangahtile Khrih an zumnak siloin an tuahthatmi pawl hmang ih vanram kai an tum ruangah a si. Amah Jesuh rori in, “Ka lo thei dah lo! Ka hnen ihsin tlan uh, nannih mitha lo pawl!” tiah a ti hai ding a si (Mt 7:23). Anmah vek pawl ih nun hi Pharisai pawl nun ihsin kan hmu thei a si. Na telve pang maw?

3. A rundamnak hrangih Khrih Jesuh a zumtu pawl

Hi pawl cun rundam an sinak ding le van an kainak ding hrangah an mai hnatuan siloin Khrih ih hnatuan an zum. A zangfahnak ruang ih zumnak ih rundam an sinak tla an theifiang (Efi 2:8-9). An nunnak ah porh ding le suan ding um hman sehla Khrih ruangah cubang pawl cu suantlak le reltlak ah an ruat lo (Phi 3:1-11). Ziangkim hi Khrih ruangah sawn a sizia theifiangtu pawl an si. Hi mipawl lakah na telve maw?

Vanram kainak a si mi Pathian ih duhnak/duhzawng cu ziang a si?

Jesuh in, “Ka Pa ih duhmi cu Fapa kha a hmu ih a zumtu hmuahhmuah cu kumkhaw nunnak an ngahnak ding kha  a si. Cule ni netabik ah nunnak ah ka thoter ding a si,” tiah a ti (Jn 6:40). Tongdangin kan sim asilen Zisuh a zumtu pawl hi Pathian duhzawng tuahtu, Amah ti lungawitu, van kai theinak neitu pawl cu an si. 

Thlahtu pi le pu Khrihtian si ruang le sakhaw mitha sinak ruangah vanram luh a theih loh. Cuvek ih theih sibang sehla Paul cun, “Khrih thihnak hi a lak a si ding,” a ti a si (Gal 2:21). Khrih Kross parih a ra thih tla a tul lo dingih mifel deuhdeuh kha vancung ram an lut mai ding a si. Asinan, minung in a felnak le a tuahthatnak pawl hmangin Pathian a ti lungawi theilo hnuah Khrih sawnin in ra rundam sawn a si. 

Pa in rundam kan sinak ding hrang A fapa in pekmi kan zum ding hi a duhbikmi cu a si. Khrih a rundamtu hrang ih a zumtu pawl lawng hi, “Bawipa, Bawipa,” tiih a kotu pawl lak ih vankai ding pawl cu an si. Anmah pawl hi Pa ih duhzawng tuahtu pawl cu an rak si. Nang na tel ve maw?