THINLUNG TAKTE IH JESUH A HAWLTU CUN AN TAWNG

Leitlun ah Pathian hawltu tam pi an um nan an zaten an hmu theh lo. Ziangahtile an hawl dan a dik theu lo ruangah a si. Miin thinlung takte ih Jesuh a hawl ahcun a tawng tengteng theu a si. Kan Bible ahcun hitin in sim, “In hawl ding ih in hmu ding. Nan thinlung takte ih in hawl tikah cun! (Jer 29:13)”. Jesuh hi thil ri kan hawl vek men ih hawl dualdo ih tawn ci a si lo, thinlung zate thawn, duhnak ngaingai neiih hawl ding a si. Cu vek ih a hawltu pawl cun a netnakah an tawng theu a si. Hi thu kan fiangnak dingah Zakia ih nunnak ihsin vun zohhnik sehla.

Luke 19 kan siar ah cun siahkhawn hotu Zakia ih thu kan hmu. An san laiah khan siahkhawntu pawl le hlawhhlang pawl hi misual ih an ret mi le an hmuhsuam zet mi pawl an rak si. Zakia hi hotu a si ih, a kut tang pawlih tihzah mi pakhat a si ve. Tulaisan si sehla, milian zet, mai duhduh nei thei le lei thei dinhmun, mi pawlih tihzah mi a si ve ding. Cu tlukih lian si hman sehla a nun ah khan thil kim lo a um. Cu cu Zisuh a si. Zisuh neilo lennak cu zianghman lo men tinak a si. 

Nikhat cu Zisuh Zakia te khua ah a dungthluntu pawl thawn an feh. Cui thu cu  Zakia in a theih tikah a lungawi tuki, “Zisu an ti mi pa cu zo a si?” tiah hmuh tumin mipi lakah a tlan ve, asinan a fatet tuk ruangah a hmu ve thei lo. A sinak, hotu dinhmun hman ruat nawn loin Zisuh hmuh duh rori ah thingparah a kai a si. Nang le kei si sehla, “Ho emai” kan ti ding ih kan tlung deih ding a zum um. Asinan, Zakia ih Zisuh hmuh duhnak thinlung cu thinlung takte ih hmuh duhnak a si ruangah a bei a dawng lo. Mipi kha hmuahhmuah lakah an inn ah Zisuh a thleng a si. An innsangah rundamnak tiang a thlen phah a si.

Unau, na thinlung taktein Zisuh na tawng ve duh a si ahcun, Zakia vekin na tawng tengteng ding a si. Mi pawlih zahpi mi le hnawn mi si khal awla, Zisuh cun a lo zah pi lo ih a lo hnawng lo. Na hnen ih um a duh a si. Rundam si na duh ngaingai maw? Na thinlung zaten Zisuh hrangah sangka ong aw. Misualbik vek ih an zoh mi Zakia tla Zisuh in a cohlang thotho a si. Ziangvek ih misual si khal awla, Zisuh in a lo hnawng lo, a lo duh a si. A rundamnak cu a lo hmuhfiang ter tengteng ding a si.