NGAIDAMNAK PHUNHNIH

Ngaidamnak timi cu ziang a si? Mi pakhat in thilsual midang par ih a tuah tik ah, a tuahsualnak nu/pa hnen ihsin cawhkuan tuar lo ih luat ter lole ngaidam hi a sim duh mi a si. Zumtu hrang lawng ah silo, mi hmuahhmuah hrang ah ngaidamnak timi hi a sunglawizet mi a si. Thil kan ti sual mi par ih ngaihdamnak kan co tla hi thinlung muril sung tiang damnak a pek a si. Minung pakhat le pakhat ngaidamawknak hman cu tluk ih sunglawi asiahcun Pathian ih in ngaidamnak cu a sunglawi sinsin a si. Kan Bible sung ah Pathian ih ngaidamnak phunhnih kan hmu thei. Cu pawl cu,

1. Kumkhaw hrang ngaidamnak

Kumkhaw hrang ngaidamnak hi ziangtin kan co ti asile, Adam tluksiatnak ruangah mi hmuahhmuah cu misual thi ding, hell feh ding kan rak si (Rom 5:12). Minung in amai hrangah Pathian hnen ihsin ngaidam a si theinak dingah zianghman tuah theimi a nei lo. Ziangahtile a ralpa Setan ih fa an si theh zo ruangah a  si. Cui dinhmun ihsin runsuah theidan lamzin pakhat lawng a um. Cucu Jesuh ih sual ai-awh thihnak lawng hi a si. Khrih cu misual pawl ngaidam an si theinak dingah Kross parah a thi ih, a thawhsal hnuah Amai thisen rori cu Pathian hnenah kumkhaw daih ngaihdamnak hrangah a hlan a si (Heb 9:11-12). Hlanlai Israel puithiam pawl vek ih kumtin raithawinak pek tul nawn loin, vawikhat ah a pek fel theh. Khrih ruangah misual nang le kei cu kumkhaw hrang ngaihdam kan rak si. Hi rundamnak thu na thei ih na zum veten kumkhaw ngaihdamnak cu na co a si. 

Hi kumkhaw ngaihdamnak hi Pathian thawn Pa fa kan sinak (relationship) hrang asiruangah kumkhua in Pa fa kan si ringring ding tinak a si. Hi Pa fa sinak hi ziangtik hman ih se thei nawn lo le hlo thei nawn lo mi a si. 

2. Nitin tuahmi sual ngaidamnak

Zumtu hi Pathian fa a si hnuah sual a nei nawn lo maw si? Nei tuk e. John cun, “Sual ka nei lo nan tiah cun mah le mah bum aw nan si. Thutak nan sungah a um lo a si,” a ti (1John 1:8). Pathian fa kan si hnu, kan pianthar hnu khal ah sual kan nei thotho lai a si. Van kan thlen hlan cu hi sual ci a si mi Adam hnen ta hi kan mahah a um ringring thotho ding a si. Asinan zumtu cu sual tuah lo theinak caknak amah ah a um a si.

Asile zumtu in sual a tuah tikah ziang a cang ding? Pathian thawn an pehzawmawknak relationship cu cat lo hmansehla an pawlkawmawknak (fellowship) a cat thei a si. Tahthimnak ah, nu le pa in tuah lo ding an ti mi kan tuah tikah an kiangah um tla nuam kan ti lo ih, kan hmai tla a hngal thei nawn lo. Tu hlan ih kan duh poh kan dil ngam theu mi tla kan dil ngam nawn lo vek khi a si. An fa cu kan si ringring lai ko nan, an thu kan lung lo ruangah a hlan vekin kan nel nawn lo vek khi a si. Zumtu Pathian fa hrangah cun a thulun hi a thabik mi a si.

Cui zumtu Pathian fa a sual tikah, a sualnak le a mawhnak pawl Pathian hnen ah ngaidam a dil asile a sualnak hmuahhmuah cu ngaihdamsak a si thu Paul cun, “Pathian hnenah kan sualnak kan phuan ahcun zum tlak le a dingmi a si ruangah kan sualnak in ngaidam dingih kan mawhnak hmuahhmuah a thiangfaiter ding,” a ti a si (1John 1:9). Hi ngaidamnak hi fa sinak hrang ngaidamnak si loin pawlkawmawknak (fellowship) that salnak ding hrang ngaihdamnak a si. Nu le pa in fate thil ti sual ngaihdam an dil mi an ngaidamsal vek hi a si. 

Zumtu tampi cun thil sual kan vun tuah caan ah Pathian kan par ah a thinheng ringring ding ah kan ruat ih, Amah hlat sinsin-nak ah kan hmang theu. Setan bumnak a si. Pathian hi kan par ah a thin a heng lo ih hlei ah kan sualnak pawl ngaidam dingah a ralring ringring a si. Thil sual kan va tuah pang cang a um khalah David siangpahrang bangin Amah Pathian hnen ah thotho kan kirsal hi a thabik mi a si. Cule Amah in in tuamdamsal ding a si. Amen.