NAUHAK TLA KAN PIANGTHAR THEI PART-IV

Part-III Siar Hmai aw... (Click aw)

Ṭhal tlawngpit caan a hung thleng lala thlang, nauhak pawl tla caan lawng an nei thlang. Kumtin vawikhat an tuah ṭheu mi nauhak crusade tuah caan tla a ra kim thlang. Tuiṭum nauhak crusade an tuah mi cu BB hrangah kumdang thawn bangaw loin, simfiang theilo khawp ih lungawinak thlen kum a si. Ziangahtile, a nauhak lai ihsi a rak theifiang cak zet mi le Pathian hnen ih thlacamnak thawn a rak dil rero mi piantharnak kha, hi ṭum crusade-nak ah a fiang ngah vuarvi ruangah a si. 

BB cu thuzirnak hmunah cun a va feh ih, kilkhat ih a um mi tohkham ah to phahin Pathian thu ṭhaten a ngai rero. An Sayamah cun, Jesuh ih rundamnak thu pawl tahṭhimnak thawn a vun sim thlang. “Pathian in a lo duhdawt hai tuk ruangah hell ram nan tlak a sianglo ih a Fapa Jesuh sungah a lo ret hai. Cutikah nan nih pawl cu Jesuh sungah nan um zo a si,” tiah a sim rero hai. Cule an sayamah cun Bible a lakih cu mi sungah pen a ret ih, Bible cu tokham parah a vun ret. Hitin thu a sut hai, “Pen Bible sung ih ka ret mi kha a tu khawiah a um?”. Cule BB le nauhak dang pawl cun, “Tohkham parah,” tin phurnawnin an au. Cule an sayamah cun TV parah a Bible cu a ṭhin lala, “Tuteh khawiah a um?” ti’n a sut lala. “TV parah,” ti’n phurzet in tuan ih an au hnakih ring in an au lala. Cule Sayamah cun, “Aww, nan sim mi a dik. Bible sungah pen a um zo ruangah Bible ka retnak hmunih kipah pen a um ve vivo naksan a si. Cuvekin nan nih pawl tla, Pathian in Khrih ah a lo ret zo ruangah, Khrih umnak hmun van cu nan um nak ding hmun a si,” ti’n a simfiang hai. 

Cule ve ten, BB cun a thinlung ten, “Eii.. Pathian in Khrih sungah in rak ret zo si maw…! Kei cu Khrih sungah ka um zo si maw..?,” ti’n mangbangzetin thu a ruat rero. Cule an Sayamah cun, “Khrih cu khawinah a um? Hell ah maw van ah?” ti’n a sut hai. BB khal cun, “Van ah” ti’n ringpin a rak sawn ve. Cule an saymah cun, “Khrih cu hell a tla kem?” ti’n a sut lala hai. BB cun phurnawn in ringpin, “Tla lo ding!!,” tiah a rak sawn. An sayamah cun, “Aw.., a dik mi a si. Khrih cu ziangtik hmanah hell a tla lo ding. Cule Amah sungih um tu pawl tla an tla lo ding. Khrih hell a tlak lawngah an tla ve ding fang mi hi a si. Asinan, Khrih cu hell ziangtik hmanah a tla dah lo ding,” ti’n a vun simfiang vivo.  BB cun cui thu a thei tikah mak ti phah cingin, “Kei cu Khrih ah ka um zo, Khrih cu hell a tla lo ding ruangah, kei tla ka tla ve nawn lo ding, kei cu Khrih sungah ka him zo si,” ti’n lungawi zetin Pathian zangfahnak thawn rundamnak cu a fiang zo a si. 

BB cun Jesuh Khrih cu a rundamtu ah a zum ih a cohlang zo ruangah kumkhaw nunnak a nei zo a si (Johan 3:16). Jesuh zum ih cohlang hi vanram kainak lole rundamsinak a si. Rundamnak thu theih men lawng kha rundamnak a rak si lo. Mai hrang rori ih zum ih cohlang ding a rak si. BB bangin Jesuh rundamnak thu a thei ih a zum tu, a cohlangtu na si ve ah cun kumkhaw nunnak na co ve ding a si.

BB cu kum riat a rak si lai ihsi a rak theihcak thluahthlo mi rundam si theihfiangnak kha kum hleithum a si ah a fiang ngah riai. Kum riat a si lai ihsi thlacamnak ih a rak hlan mi kha Pathian in a theihsak ringring ih a thlacamnak a sansak a si. BB cu a lungawi tuk ih Pathian hnenah lungawithu tla a sim rero. BB hi na lungawipi ve maw? Ziangruangah BB a lungawi? 

BB Sayamah ih sim mi hi ṭhaten ruat ve aw…

BB lawng hi Khrih sungah Pathian in a ret mi a si lo, nangmah tla a lo ret ve a si. BB in rundam thei fiangawknak a nei zo bangin nangtla in na nei ve thei a si. Amah Pathian rori in hell na tlak a siang lo ih Khrih sungah a lo ret ve zo. Cui thu cu BB bangin na zum ve asilen Khrih hnen ah kumkhua in na um ve ding  a si. Hell na tla lo ding. Hell ihsin na luat ve ding a si.

Bible byheart ding: Kolosa 3:3 “Nan thi zo ih, nan nunnak taktak cu Pathian ahcun Khrih hnenah thuh in a um a si.”

BB in kum upa zo pawl lawng piangthar thei ding le rundamnak co thei ding ih a rak ruah mi kha a si lo ti a thei thlang. Amah rori ih nun ihsin Pathian in, “Nauhak pawl tla rundam an si thei ti le an piangthar thei,” timi kha a sim fiang a si. Hell ram tlak a rak ṭih thupnak pawl hmuahhmuah kha a hlo vuarvi ṭheh ih, “Vanram cu keimai ta a si zo,” a ti thei thlang. BB bang in, “Vanram cu ka ta a si ve zo a si,” na ti thei ve thlang maw?

BB cu a thinlung sungten a lungawi tuk ih, a theihfiang mi rundamnak thu cu a um menmen pi thei nawn lo. An innhnen nauhak dang pawl hnenah a mah a theifiang dan le a sim thiam ve dan tawkin a sim ve hai. A theihfiang mi rundamnak thu kha a um pi men thei lo a si. Midang pawl tla in a theih mi, “Rundamnak” thu hi theifiang ve haiseh ti hi, a duhbik mi a si thlang. Nangtla na theifiang zo mi Jesuh ih rundamnak thu hi na rualpi pawl hnenah na sim ve thei a si. Cu cu Jesuh ih duhbikmi tla a si (1Timothy 2:4).

BB thuanthu ihsin ziang zir ding kan nei?

1.    Zirhtu Saya/Sayamah pawl ih fial ruangih tettikhannak hi piantharnak/ rundamnak a si lo.

2.   Piantharnak hi upa zo pawl hrang lawng a rak si lo. Nauhak lai khalah pianthar a theih a si.

3.   Pi le pu, Nu le Pa thlacamsaktu ṭha neih hi a sunglawizet mi a si.

4.   Nauhak thlacamnak Pathian in a theihsak.

5.   Thinlung ih duhnak a tel mi thlacamnak Pathian in a co hlang.

6.   Nauhak thlarau thlahthlam lo ding.
7. Nauhak khal in kan rualpi hnen ah rundamnak thuthangtha kan sim ve thei a si.

Siartu nan zate parah Pathian in thlawsuah lo pe hram seh. Amen. 

Part-I ihsin siar duh hrang hi mi Click aw.