VANRAM KAI THEINAK PATHIAN DUHZAWNG TUAHTU ZO AN SI?

Bible verse: “Bawipa, Bawipa,” tiih I kotu pohpoh in vancung uknak an thleng thluh lo ding; vancung ih a ummi ka Pa ih duhnak a tuahtu lawnglawng an thleng ding a si.” (Mathai 7:21)

Leitlun ah a nungmi Pathian a betu cu kan mah Khrihtian le Juda pawl lawng kan si. Vanram kai ding thuah a neitu Amah Pathian hman be lotu hrangah cun kai theinak lamzin a hla sinsin. Kan Bible tarlan mi kan zoh asilen Khrihtian a ti aw mi lakah a phunphun kan um ti a fiang. “Bawipa, Bawipa,” tiin kan ko cio konan vanram kai ding kan si theh lo tinak a si. Asilen…

Zo pawlin “Bawipa, Bawipa,” tiah an ko?

1. Pi le Pu Khrihtian si ruang ih a hmin ih Khrihtian si pawl

Hi pawl hin Khrihtian kan si cu an ti aw ve konan, kohhran lam hnatuannak ah lang dah lem lo, khawm kha khawm dah lo, Bible kha siar dah lo le Pathian thu kha ngaihsak lo pawl an si. An kaa cun Pathian hi “Bawipa, Bawipa,” tiah an ko ve thotho. Khrihtian tiawk ding hman hi an phur tuk loh caan tla a um theu. Pumpak zalennak ram ih a um pawl tla cu Khrihtian sinak ihsin biaknak neilo dinhmun tiang an si phah a si. Na rak si ve ziar maw? 

2. Sakhaw mi tha Khrihtian pawl

Hi pawl ve thung cu minung danah an sinak hrimhrim hi mifel le taima, pe aw thei tuk le roreldan kha thiam emem pawl an si theu. Kohhran hnatuannak le biaknak lam hrang a tul mi a si phawt cun an ziang kha pek an siang. Zuk le hmuam khal ah an fihlim tlangpi. Hi ti zoh men khalah minung danah cun piangthar lawlaw an si. An nih hnak ih piangthar dang an um thei nawn lo ding ti ding khawp ih mifel le tlawmngai thei an si. Mi fak le tihzah le lawm hlawh an si. Pathian tla hi an mai ta bik le an Pa si bik ding hi a bang. Asinan, Pathian mithmuh ah cun a parih kan sim mi pawl thawn bangawrep an si. Zumlotu thawn a bangaw mi an si. Ziangahtile Khrih an zumnak siloin an tuahthatmi pawl hmang ih vanram kai an tum ruangah a si. Amah Jesuh rori in, “Ka lo thei dah lo! Ka hnen ihsin tlan uh, nannih mitha lo pawl!” tiah a ti hai ding a si (Mt 7:23). Anmah vek pawl ih nun hi Pharisai pawl nun ihsin kan hmu thei a si. Na telve pang maw?

3. A rundamnak hrangih Khrih Jesuh a zumtu pawl

Hi pawl cun rundam an sinak ding le van an kainak ding hrangah an mai hnatuan siloin Khrih ih hnatuan an zum. A zangfahnak ruang ih zumnak ih rundam an sinak tla an theifiang (Efi 2:8-9). An nunnak ah porh ding le suan ding um hman sehla Khrih ruangah cubang pawl cu suantlak le reltlak ah an ruat lo (Phi 3:1-11). Ziangkim hi Khrih ruangah sawn a sizia theifiangtu pawl an si. Hi mipawl lakah na telve maw?

Vanram kainak a si mi Pathian ih duhnak/duhzawng cu ziang a si?

Jesuh in, “Ka Pa ih duhmi cu Fapa kha a hmu ih a zumtu hmuahhmuah cu kumkhaw nunnak an ngahnak ding kha  a si. Cule ni netabik ah nunnak ah ka thoter ding a si,” tiah a ti (Jn 6:40). Tongdangin kan sim asilen Zisuh a zumtu pawl hi Pathian duhzawng tuahtu, Amah ti lungawitu, van kai theinak neitu pawl cu an si. 

Thlahtu pi le pu Khrihtian si ruang le sakhaw mitha sinak ruangah vanram luh a theih loh. Cuvek ih theih sibang sehla Paul cun, “Khrih thihnak hi a lak a si ding,” a ti a si (Gal 2:21). Khrih Kross parih a ra thih tla a tul lo dingih mifel deuhdeuh kha vancung ram an lut mai ding a si. Asinan, minung in a felnak le a tuahthatnak pawl hmangin Pathian a ti lungawi theilo hnuah Khrih sawnin in ra rundam sawn a si. 

BIBLE ZOHZIR (STUDY) DAN TAWI

PATHIAN IN A LO KILVENG/UMPI RINGRING

Hi leitlun kan um sungah cun minunglam dan ah kan duhthusam a kim thluahthlo timi hi um ngaingai thei lo mi a si. Riahsiat caan, lungawi caan, hnih caan, ṭah caan, ti’n caan hi a thlengaw zawk rero. Lungawinak thawn kan khat hmang ti laiah thinlung sung thupte ah lungngaihnak thawn kan khah caan tla a um. Hringnun timi hi khawruahharza a rak si. Pathian neilo pawl hrang ah a har hleice cuang ding ti’n ka ruat ṭheu. Ziangahtile, kan nih zumtu Pathian fa pawl cun a nung mi Pathian kan nei ih, kan mangbangbik lai caan khalah Amah ah beiseinak nung in peksal ringring ṭheu. Zumtu nun ah vanse pittawp timi hi a um thei ngaingai lo. Ziangahtile, kan hrang ih ṭhatnak ding lawnglawng in Amah Pathian in hna in ṭuansak ṭheu ruangah a si.

Minung dan ah kan nuntuh khawsaknak hrangah tiah khawruatbuai thinhar ih um caan a rak um ṭheu. Kan hmailam thu ruah caan ah a pit ṭheh maw si tih ding ko ih thinpit mangbang vansanglam caan tla a rak um ṭheu. Pathian teh hi a um ngaingai maw si, hi tluk lawmlam a va reh emem ve! ti ding ko ih nun beidawng caan tla a rak um ṭheu. Na mawh lo. Kan mawh lo. Asinan, ṭhaten kan vun ruat hnik pei. Atu ih na lungthin bangnak le beidawngnak pawl hmuahhmuah kha ziangruangah a si pei? Kan tuahthei loh mi thil kan mahten tuahsuah ṭheh kan tum ruangah a si. Saam 23 ah cun, “Bawipa cu ka tuukhal ṭha a si,” a ti. Tuu ei ding rawl le a hei mi tidai hawlsaktu cu tuukhaltu sawn a si. Tuu cu a khaltu rinsan/zum in a nun a hmang ih nun hahdamten a um. Nang leh kei Pathian ih tuu a si mi pawl cu kan mahten ziangtinkim hawl kan tum ṭheu ruangah thinlung mangbang vansang ih kan um ṭheunak a si. Tuu sawn in tuukhaltu hna ṭuan kan tum tikah kan hlawhsam ringring ṭheunak a si. In neitu Pathian sawn ah kan zumnak thumaw sawn  ih hnangamten um ding kan rak si. 

Vawikhat cu ka nau thawn kan leng ih kan tlun lamah kan to mi mawtaw (car) a siat. Thil makzet a si mi cu, kan feh lam hmanah a khawl awn kha a dik nawn lo. Hi vek lam ih experience nei lo cu a ziang kha theithiam lawn hnangamten kan to men. Kan tlunlam khalah 90kmh tlannak tlan rero a si ko. Kan vengnai kan vun thlen cun, speed kha 60kmh lawng a si thlang. Minung lam danah cun vanthatthlak takin traffic a jam ih din leuhleuh le muangnawn ih feh a si (Thil pakhatkhat cang tla len a zia deuh tinak) . Cutikah mawtaw cu a thi thlang. Lamzin laiah len a si fawn, midang kan kham ṭheh ding ti phangthawn a khawl kan vun nun sal ih, cutin a hung nung tento hnuah zin penglam ah kan feh ih, rem deuhnak hmun thingkung tangah a thi ta riai. Nun tum rero khalen a nung thei nawn lo. Khati a um sanbik cu a engine a rak sat tuk ruangah a si. Hi thil umdan pawl ka vun ruahsal tikah PATHIAN IH KILVENNAK LE UMPIT-NAK a si zia ka vun mangsuak. Cui harsatnak sung ihsin Bawipa thangṭhat theinak nun kha a ra suak sawn a si. Kan mawtaw siat cu maw ka lungawi? Si hlah e! Pathian in thihnak sung ihta in runsuak mi le in umpi ringring mi sawn kha a si. Simcia zo vekin feh lam ihsin a khawl awn dik nawn lo mi a si. 90kmh ih tlannak zinlai fangah thi thut bang sehla kan dinhmun ding cu khawruah harza a si ding. Vanṭhatnak a si hmang tiih ka rak ruah mi kha Pathian kil-himnak sawn a rak si. Zumtu hrangah vanthat le vansiat timi hi a rak um lo. Amah Pathian ih lairelnak sawn a rak si. Ka ruatsuak mi cu, “Aww, Pathian hin in ngaihsak nawn lo maw si, in tanta zo maw si, tiih kan ruah rero lai caan khalah in bawm dingin kan kiangah a um ringring a si,” ti hi. 

Zozo cio khalin kan nun ah, “Eihaa..! A har fualfo tuk aw!,” ti caan kan nei ko ding. Cuti kan ti caan te-ah kan nun ih kan ruahban loh mi Pathian kutcak a rak thleng dah zo mi pawl kha ruahsal hna kan thiam asiahcun “A har fualfo” kan tinak pawl kha an hlo ṭhehsal ding a si. Na tha a tlungtersal ding a si. Ziangahtile kan Pathian cu a nungmi Pathian a si ih, kan hrang ih tṭhabik in khua a khang ṭheu. A tlai hmang kan ti ṭheu nan a rak tlai dah lo. A caan a ti mi a kim hrih lo ruang men a rak si ṭheu. Na harsatnak, na mangbangnak pawl Amai hnen ah thlen ringring ṭheu aw, ziangahtile Ani cun a lo ngaihsak a si (1Peter 5:7). A lo ngaihsakzettu Pathian na hnen ah a um ringring a si. Amen!

NGAIDAMNAK PHUNHNIH

THINLUNG TAKTE IH JESUH A HAWLTU CUN AN TAWNG

NAUHAK TLA KAN PIANGTHAR THEI PART-IV

Part-III Siar Hmai aw... (Click aw)

Ṭhal tlawngpit caan a hung thleng lala thlang, nauhak pawl tla caan lawng an nei thlang. Kumtin vawikhat an tuah ṭheu mi nauhak crusade tuah caan tla a ra kim thlang. Tuiṭum nauhak crusade an tuah mi cu BB hrangah kumdang thawn bangaw loin, simfiang theilo khawp ih lungawinak thlen kum a si. Ziangahtile, a nauhak lai ihsi a rak theifiang cak zet mi le Pathian hnen ih thlacamnak thawn a rak dil rero mi piantharnak kha, hi ṭum crusade-nak ah a fiang ngah vuarvi ruangah a si. 

BB cu thuzirnak hmunah cun a va feh ih, kilkhat ih a um mi tohkham ah to phahin Pathian thu ṭhaten a ngai rero. An Sayamah cun, Jesuh ih rundamnak thu pawl tahṭhimnak thawn a vun sim thlang. “Pathian in a lo duhdawt hai tuk ruangah hell ram nan tlak a sianglo ih a Fapa Jesuh sungah a lo ret hai. Cutikah nan nih pawl cu Jesuh sungah nan um zo a si,” tiah a sim rero hai. Cule an sayamah cun Bible a lakih cu mi sungah pen a ret ih, Bible cu tokham parah a vun ret. Hitin thu a sut hai, “Pen Bible sung ih ka ret mi kha a tu khawiah a um?”. Cule BB le nauhak dang pawl cun, “Tohkham parah,” tin phurnawnin an au. Cule an sayamah cun TV parah a Bible cu a ṭhin lala, “Tuteh khawiah a um?” ti’n a sut lala. “TV parah,” ti’n phurzet in tuan ih an au hnakih ring in an au lala. Cule Sayamah cun, “Aww, nan sim mi a dik. Bible sungah pen a um zo ruangah Bible ka retnak hmunih kipah pen a um ve vivo naksan a si. Cuvekin nan nih pawl tla, Pathian in Khrih ah a lo ret zo ruangah, Khrih umnak hmun van cu nan um nak ding hmun a si,” ti’n a simfiang hai. 

Cule ve ten, BB cun a thinlung ten, “Eii.. Pathian in Khrih sungah in rak ret zo si maw…! Kei cu Khrih sungah ka um zo si maw..?,” ti’n mangbangzetin thu a ruat rero. Cule an Sayamah cun, “Khrih cu khawinah a um? Hell ah maw van ah?” ti’n a sut hai. BB khal cun, “Van ah” ti’n ringpin a rak sawn ve. Cule an saymah cun, “Khrih cu hell a tla kem?” ti’n a sut lala hai. BB cun phurnawn in ringpin, “Tla lo ding!!,” tiah a rak sawn. An sayamah cun, “Aw.., a dik mi a si. Khrih cu ziangtik hmanah hell a tla lo ding. Cule Amah sungih um tu pawl tla an tla lo ding. Khrih hell a tlak lawngah an tla ve ding fang mi hi a si. Asinan, Khrih cu hell ziangtik hmanah a tla dah lo ding,” ti’n a vun simfiang vivo.  BB cun cui thu a thei tikah mak ti phah cingin, “Kei cu Khrih ah ka um zo, Khrih cu hell a tla lo ding ruangah, kei tla ka tla ve nawn lo ding, kei cu Khrih sungah ka him zo si,” ti’n lungawi zetin Pathian zangfahnak thawn rundamnak cu a fiang zo a si. 

BB cun Jesuh Khrih cu a rundamtu ah a zum ih a cohlang zo ruangah kumkhaw nunnak a nei zo a si (Johan 3:16). Jesuh zum ih cohlang hi vanram kainak lole rundamsinak a si. Rundamnak thu theih men lawng kha rundamnak a rak si lo. Mai hrang rori ih zum ih cohlang ding a rak si. BB bangin Jesuh rundamnak thu a thei ih a zum tu, a cohlangtu na si ve ah cun kumkhaw nunnak na co ve ding a si.

BB cu kum riat a rak si lai ihsi a rak theihcak thluahthlo mi rundam si theihfiangnak kha kum hleithum a si ah a fiang ngah riai. Kum riat a si lai ihsi thlacamnak ih a rak hlan mi kha Pathian in a theihsak ringring ih a thlacamnak a sansak a si. BB cu a lungawi tuk ih Pathian hnenah lungawithu tla a sim rero. BB hi na lungawipi ve maw? Ziangruangah BB a lungawi? 

BB Sayamah ih sim mi hi ṭhaten ruat ve aw…

BB lawng hi Khrih sungah Pathian in a ret mi a si lo, nangmah tla a lo ret ve a si. BB in rundam thei fiangawknak a nei zo bangin nangtla in na nei ve thei a si. Amah Pathian rori in hell na tlak a siang lo ih Khrih sungah a lo ret ve zo. Cui thu cu BB bangin na zum ve asilen Khrih hnen ah kumkhua in na um ve ding  a si. Hell na tla lo ding. Hell ihsin na luat ve ding a si.

Bible byheart ding: Kolosa 3:3 “Nan thi zo ih, nan nunnak taktak cu Pathian ahcun Khrih hnenah thuh in a um a si.”

BB in kum upa zo pawl lawng piangthar thei ding le rundamnak co thei ding ih a rak ruah mi kha a si lo ti a thei thlang. Amah rori ih nun ihsin Pathian in, “Nauhak pawl tla rundam an si thei ti le an piangthar thei,” timi kha a sim fiang a si. Hell ram tlak a rak ṭih thupnak pawl hmuahhmuah kha a hlo vuarvi ṭheh ih, “Vanram cu keimai ta a si zo,” a ti thei thlang. BB bang in, “Vanram cu ka ta a si ve zo a si,” na ti thei ve thlang maw?

BB cu a thinlung sungten a lungawi tuk ih, a theihfiang mi rundamnak thu cu a um menmen pi thei nawn lo. An innhnen nauhak dang pawl hnenah a mah a theifiang dan le a sim thiam ve dan tawkin a sim ve hai. A theihfiang mi rundamnak thu kha a um pi men thei lo a si. Midang pawl tla in a theih mi, “Rundamnak” thu hi theifiang ve haiseh ti hi, a duhbik mi a si thlang. Nangtla na theifiang zo mi Jesuh ih rundamnak thu hi na rualpi pawl hnenah na sim ve thei a si. Cu cu Jesuh ih duhbikmi tla a si (1Timothy 2:4).

NAUHAK TLA KAN PIANGTHAR THEI PART-III

Part-II siar hmai aw...  

Ṭhal caan a hung thleng, khawsik caan a liam, kum tla a hung thar thlang, BB tla kum kua a rak kim ve zo. An kohhran in camping kumkhat vawikhat an neih ṭheu mi caan tla a hung thleng. An kohhran in Gospel camping an neih ding thu cu BB tla in a rak thei ve. A lungawi tukih a khir rero. “Yay..,yay.., camping ka kai ve ding,” tiah khir phah in a au zawk rero. Asinan, camping kai theitu ding hmin pawl an lak tikah BB cu camping nakah luh an siang ve lo. Ziangahtile a ni cu kum kua lawng a rak si ruangah a si. Kum hleikhat ihsin lawng luh ngah a rak si. Mithli haal cingin a dil rero nan an rak siang lo. “Na nauhak tuk lai, midang na hnaihnawk menmen,” an rak ti. BB cu riahsia zetin a um ih a thupten a mitthli a hnul rero. A lung thin sungih a riahsiatnak pawl cu Pathian in a mangsak ringring. Cutin gospel camping lut ngah loin a um. BB bangin Pathian thu na zir cak caan ah zir ngah lo in na um ve dah maw? Caan ṭha na nei mi kha Pathian thu ngainak ah hmang ṭheu aw maw.  

BB cu nauhak a si ko nan a beidawng duh lo. Pathian in nauhak thlacamnak a theihsak ringring ti a thei ruangah a duhbik mi, “piantharnak” co thei ding cun a thlacamnak ah a dil peh ringring. BB vanṭhatnak bik cu, pi le pu duhdawttu le thlacamsaktu a nei ringring ruangah a si. A pi tla cun a tu le fa pawl hrangah thlacamsak hi a baang dah lo. Cu tlukih pi ṭha, nu ṭha a si. Cawntlak zet mi a si. BB bangin thlacamsaktu pi le pu, nu le pa na nei ve maw? Na nei lo pang asitlalen na hrang ih cawl lo ih thla lo camsaktu Thlarau Thianghlim a um a si (Rom 8:26 ). Na riahsia hlah aw maw. 

 

Cutin kum le caan a hung herliam vivo, BB tla kum hleithum a rak kim ve thlang. Tlawng tla phun riat a kai rero thlang. Asinan, rundamnak thu hi a thinlung sungah theifiangnak ngaingai a nei thei hrih cuang lo. Jesuh in in rundam ti mi cu a theituk ko nan, amah ah theifiangnak ngaingai kha a rak um thei cuang lo. Hell ram tlak ding kha a ṭih thluahthlo lai thotho. BB vekin Jesuh rundamnak thu thei thluh ko nain rundam si theifiangnak neiloin na um ve maw? Na beidawng hlah aw maw.

NAUHAK TLA KAN PIANGTHAR THEI PART-II

Part- I siar hmai aw...Part I

BB cu nauhak lungfim kum riat mi a si ve zo tikah, hellram thu le vanram thu tla a thei zo. Hell ram ah cun a mit dahlomi meisa alh hluahhlo mi le a thi theilo mi pangan pawl tla an um ih, cu pawl in an keu rero ding ti tla a thei (Mark 9:48). Hell ram feh ding hi a ṭih tuk. Ziangahtile hell ram cu piangthar lo, Jesuh neilo pawl fehnak ding a si (Thuphuan 21:8). BB cun Jesuh thawn vanram nuam ih kumkhua um ding mi hi a cak zet mi a si. BB vekin Jesuh hnen na um ve duh maw?

BB cu hell ram feh ding a ṭihtuk ruangah, “Ziangtin ka piangthar ve thei ding?” ti mi thu lawnglawng a ruat thlang. A ruahnak ah cun nauhak pawl hi an piangthar thei ding a zum lo. Ziangahtile nauhak an si lai ruangah upa deuhhnu, kum sawmthum lanhnu pawl hrang lawngah a rak ruat. Amahten a thin sungah a ruat buai rero thlang. Zohman le a sut ngam fawn lo. Cutin thinhar thupnak nei in a um ringring. BB bangin hell ram tlak ṭih thupnak neiin thinbang in na um ve pang maw? Amah bangin pianthar duhnak na nei ve maw?

Nikhat cu BB amahtein a um rero laiah a nute le a pute a kiangah an ra ih mithianghlimlawr thu an rel rero. Mithianghlimlawr ti mi cu, Jesuh in Amah a zumtu pawl lole piangthar pawl vanram ih a laksoh ding mi sim duhnak a si (1 Thessalonians 4:17).  A Nute cun BB cu capoh phah in, “Nang cu mi thianghlimlawr ah na tel fawn lo ding ih, ‘kum sarih harsatnak*’ sungah na lut ding. Vanram kai na duh tlalen Setan in a lo kai hrem ta lo cun na kai thei lo ding,” tin, ṭihdingin a sim rero. BB cun a ṭih tuk. Ziangtin a nute a sawn ding ti tla a thei lo. Asinan hell ram tlak a duh lo tuk ruangah, “Vanram ka kainak ding asiahcun ka tuarsuak ko ding,” tiah a ti. Asinan, a thinlung sungah cun ṭihnak lawnglawng in a khat. 

BB cun Hell ram tlak a ṭih tuk ruangah, Pathian hnenah hitin thla a cam thlang, “Bawipa, zangfahten upa ka si tikah i piangthar ter aw maw, hell ram feh ka duh lo,” a ti zawk rero. Ziangahtile, nauhak a si lai ruangah pianthar a ngah hrih lo dingah a ruat ruangah a si. BB bangin na piangthar theinak ding hrang Pathian hnenah thlacamnak thawn na dil ve dah zo maw? Asilolen, “Ka nauhak tuklai, pianthar a ngah hrih lo ding,” ti’n ruahnak dik lo na nei ve pang maw?