RUNDAM TUL MI KAN SI

Zirnak 8
(Zirnak 7 siar hmai aw...)

  A parih kan sim zo vekin PATHIAN thawn  ṭhen aw zo kan si. A ral kan si zo tikah a umnak VANRAM luh theinak kan nei nawn lo. VANRAM cu PATHIAN ta a si. Kan nih cu Setan ih fa kan si zo ruangah VANRAM kan luh thei lo nak san a si. Rundam tul mi kan si. Tahṭhimnak ka vun sim ta ding.

              Nikhat cu nauhak pa te pakhat hi a rak um. Hramlak ih a feh rero laiah khur thuk zet sungah a tla ngah pang. Amah te in khur sung ihsin kai suah a tum rero nan a thuk tuk tikah a kai suak thei lo. Cu tikah bawmtu ding a hawl thlang. “In bawm uh, in bawm uh,” tiin a au rero. Zo hman in len an thei lo. Bawmtu len a nei lo. Rehsia zetin a ṭap rero.

         Cutiih a ṭah rero laiah pacangpa pakhat ramtawi ih a vak rero miin nauhak pa ih ṭap awn thawm cu a thei. “Nauhak ṭap thawm ka thei e, hramlak ah nauhak hlo teh an um a si pei maw,” a ti rero. Nauhak ṭap thawm umnak lam panin a feh vivo. A netnakah khur sungih a ṭap rero mi nauhak pa te cu a va hmu. Runtu neilo le bawmtu neilo a si ti a theih tikah nauhak hnenah cun, “Ṭap nawn hlah aw, keimah ka um zo si. Nangmah lo runsuaknak dingah kai lilawn ka va la ta ding maw,” a ti ih, kai lilawn la dingin a kir. Cutin kai lilawn thawn a ra kir salih nauhak pa te cu a run suak. Nauhak pa te cu a lungawi tukih amah a runsuaktu pa hnenah lungawi thu a sim rero. Cutin an pahnihin inn lam panin an tlung.

            Khur sungih a tla mi nauhak pa te hi nang le kei cu kan si. Setan ih sal sungah kan tang ih kan mah ten kan suak thei nawn lo. Thilṭha kan tuah ciam co tla len PATHIAN lung kan ti awi thei fawn lo (Isaiah 64:6). Ziangahtilen a ral kan si ruangah a si. Kan tlaknak khur sung ihsin runsuaktu, rundamtu kan ṭul a si. Nauhak tla rundam ṭul ṭheh kan si.

THUSUHNAK

1. PATHIAN ral a si zo mi nang le kei hi vanram luh theinak kan nei maw?

2. Nauhak pa te kha khawi ah a tla?

3. Amah ten a suak sal thei nawn maw?

4. Nauhak pa ih ṭul mi kha ziang a si?

5. Nauhak pa kha zo in saw runsuak sal?

6. Nang le kei teh runsuah kan ṭul ve maw?

Siar peh ding in Click aw..  Pathian In A Fapa Zisu In Pe