PATHIAN IH THIL SERSIAM MI PAWL THU

Zirnak 3
(Zirnak 2 siar hmai aw..)

            

Leitlun ah pathian tampi an um. Asinan kan PATHIAN hi pathian dang pawl hnakin a ropi sawn a si. Ziangahtile kan  PATHIAN cu a nung mi PATHIAN a si ih ziang hmuahhmuah sersiam tu a si fawn. Amah cu mangbangza  PATHIAN a si. Zum lo tu pawlih pathian cu nunnak nei lo, thaw tla nei lo an si ih ziang kha tuah thei lo an si. Kan nih kan PATHIAN cu thawknak le cemnet neilo, Amah ih ra um mi PATHIAN a si. 

               Ziang hmuahhmuah sersiam hlanah PATHIAN a rak um. Ziang hman a rak um hlanah PATHIAN cun a hmaisabik ah lei le van cu um seh a tiih, cutin lei le van tu ih kan umnak hi a ra um (Sem 1:1). Cule, PATHIAN thil sersiam dan cu hitin a si. 

Nikhatnak -Thim le Eng (Tleu) (Sem 1:3-5)

Nikhatnak ah Pathian in, “Eng um seh,” a ti ih cule Eng a rung um. Cutin Eng cu thim ihsin a then. Pathian in Eng cu Sun tiah a ko ih, Thim cu Zan tiah a ko. Zing kan tho ih khawvang (Eng) kan hmu mi le Zan kan ih caan ih khawthim kan ti mi hi a sim duh mi a si. 

Nihnihnak : Tlolak (boruak) (Sem 1:6-8)

Nihnihnak ah Pathian in, tidai pawl then tu dingah “Tlolak (boruak) um seh,” a ti ih cule Tlolak a ra um. Pathian in Tlolak cu Van (sky) tiah a ko. Tlun zuang vate pawl an zam rero nak khi a sim duh mi a si.  

Nithumnak : Leicar, thingkung le hrampi pangpar (Sem 1: 9-13)

Pathian in, a nithumnak ah “Leicar um seh,” a tiih, cule a rung um. Cui leicar cu Leilung tiah a ko. Cu theh hnuah thingkung hrampi, pangpar, ci a suah thei mi a phun phun pawl cu um seh, a ti ih, cuvekin a hung um. A tuah mi a zoh tikah tha a ti zet.

Nilinak - Ni, thlapi le arsi (Sem 1:14- 19)

Nilinak ah Pathian in, “Van tlolak ah Arsi pawl um seh,” a tiih, cule an rung um. Arsi pawl cu tleu mawi zet zetin a tuah hai. Cule Pathianin Eng tumpi pahnih tla a tuah ih, cu pawl cu Ni le Thlapi an si. Ni cu sun uktu dingah a tuah ih, Thlapi cu zan uktu dingah a tuah a si. Pathian in cu cu tha a ti zet a si.

Ninganak-Van a zuangmi vate le tisung um mi thilnung (Sem 1:20-23)

Ningatnak ah Pathian in, “Van tlolak ih a zuang theimi vate a phunphun le tisung a um mi thilnung, ngate a phunphun pawl cu um seh,” a tiih, cule an rung um. Pathian in cu pawl cu ci tam pi thlah ih karhzai vivo dingin a thlawsuah hai. A tuah mi a zoh tikah tha a ti zet a si.

Niruknak : Ramsa le minung ( Sem 1: 24-31)

Niruknak ah Pathian in, “Leilungin ramsa suah seh,” a tiih, cule ramsa pawl an rung um. Cutheh hnuah Pathianin sersiam mi hmuahhmuah tlun ih thuneitu ding milai cu a tuah a si. Pathian in milai a tuah tikah “Kan mai hmuihmel keng, kan mah bangnak nei in minung kan tuah pei,” a ti a si. Cule, leilung ih leivut (vutcam) a lakih milai a tuah. A hnar sungah Nunnak thaw a pek, cutin milai cu minung ah a rung cang. Pathian in minung a tuah mi a zoh tikah tha a ti ngai ngai a si.

Nisarihnak : PATHIAN cu ni sarihnak ni ah a hnaṭuannak ihsin a cawl a si (Sem 2:2).

             PATHIAN in a thil sersiam mi pawl hmuahhmuah a zoh tikah tha a ti zet. A lung a hmui tuk. A sersiam mi lakah minung hi in duh hlei ce cuang a si. PATHIAN ih a sersiam mi, minung hmaisabik cu Adam le Evi an si.

THU SUHNAK

1. PATHIAN in a hmaisabik ah ziang  a sersiam?

2. PATHIAN in nikhatnak ah ziang a sersiam?

3. PATHIAN in nihnihnakah ziang a sersiam?

4. PATHIAN in nithumnak ah ziang a sersiam?

5. PATHIAN in nilinak ah ziang a sersiam?

6. PATHIAN in ningatnak ah ziang a sersiam?

7. PATHIAN in niruknak ah ziang a sersiam?

8. PATHIAN cu a nisarihnak ah ziang a sersiam/tuah?

9. PATHIAN ih a sersiam mi minung hmaisabik kha zo an si?

Zirnak (4) siar peh aw .. Click Zirnak (4)