NOAH LE TILIK

Kai le Abel thuanthu kha kan manglai ciau maw? Adam te’i nupa Pathian thu an lun loh ruang ih thihnak thleng hmai bik a si. Cule leitlun ah minung an ra karh sinsin ih an sualral deuhdeuh. Pathian tla an thei nawn lo. Zu tla an in ih nuam an tawl ciamco thlang. Minung pawl cu Pathian in a zoh hai tikah a thin a naa tuk. “Minung ka rak tuah hi cu ka va sir aw so. Ka thin an naa ter tuk,” (Seem 6:6) ti’n Pathian cu a riah a se ngaingai. 

Leilungtlun minung pawl sualral tuk ih an um lai ah mifel pakhat a rak um. Amah cu Noah a si. Noah cu Pathian thawn an leng tlang ringring. Noah cun nupi a nei ih, fapa pathum a nei fawn a si. An hmin pawl cu, Shem, Ham le Jafet an si. A fapa pathum pawl khalin nupi an nei ciau a si.

 

Nikhat cu Pathian in Noah hnenah hiti’n thu a sim,”Leitlun minung pawl hi an sualral tuk lawmmam, ka that ṭheh hai ding. Leitlun ah ti ka lik ter ding ih, tidai thawn ka kholhfai ṭheh ding a si,” a ti. Cule Pathian in Noah cu long tumpi sak ding ah a fial. Ziangahtile Noah le a sungle pawl cu Pathian in a humhim duh ruangah a si. Noah cun Pathian thu a lung ih a sim vekin long a sak rero thlang. An khua mipi pawlin an hnihsan rero. Ziangahtile khailai ah ruah a sur dah lo ih ti tla a lik dah lo ruangah a si. Noah kha an zum duh lo. Mi aa ah an ruat. 

Pathian ih simvekin Noah cun long cu a sak ṭheh zo. Cule Pathian in, “Ramsa tinkim lakin pahnih fingfing, a nu le a pa long sungah na hruai lut pei. Tui hnu ni sarih ah ni sawmli le zan sawmli leitlun ah ruah ka sur ter ding. Leitlun ih thilnung um hmuahhmuah ka siatsuah hai ding,” tiah a sim. Noah cun Pathian ih sim vekin a tuah ṭheh. Tilik sungih an ei ding mi pawl tla long sungah a than ṭheh zo. A nupi fanau pawl tla long sungah amah thawn an lut ih cutin Pathian in long sangkaa a khar sak.

       Pathian ih sim mi ni sarih a kim hnuah leitlun ah ruah a sur thawk rero thlang. Leilung thukzet ih ti-hna hmuahhmuah tla in tidai an ra suah ciam co. Van sangkate pawl tla a ong aw thluh ih ruahpi tam pi a sur rero. Cutikah leilung cu tidai in a khuh vivo a si. Noah ih long sungih a um mi ramsa tinkim le a sungle ti lo cu leitlun ah a dam mi zo hman an um nawn lo. Tilik ah an thi ṭheh hai a si. Ni sawmli le zan sawmli ruahpi a sur hnu ah tidai in leilung cu ni za le sawmnga sung a khuh (Seem 7:24). Cutin tidai cu a kang vivo ih Noah lawng tla Ararat ti mi tlang parah a cawl a si. 

Noah cun long sungin suah a ngah zo ke maw, ti thei duh ah tlang-ak pakhat a thlah. Tlang-ak cu a zam a zam hnu ah colhnak a hmu lo ih a ra kir sal. Noah cun ni sarih a hngak sal hnuah thuro a thlah sal la la. Thuro khal cu a zam a zam ih Olive hnah ṭawhmi thawn a ra kir sal. Noah cun Olive hnah a hmu tikah leilung ah tidai a kang thlang ti a thei. Cule an sung zate le ramsa hmuahhmuah thawn long sung ihsin an ra suak ṭheh a si. An lungawi ngaingai.

Noah cun Pathian hnenah raithawinak a hlan ih cule Pathian in Noah hnen ah thukhamnak a tuah. Pathian in, “Leilung hi tilik in ka siatsuah nawn lo ding,” ti langternak ah “Vangro” a um ter a si. Vangro kan hmuh tinten Pathian in Noah hnen ih thukham a tuah mi kan mangsuak ringring thlang ding a si.

Noah le tilik thuanthu ihsin Zisuh rundamnak thu ziang mi kan zir thei? Leitlun minung sualral pawl vek khan kan nih tla Adam ruangah misual, thi tlak kan rak si. Pathian in Noah le a sung le pawl rundamnak ah long a tuah ter vekin kan nih pawl hrangah A FAPA Zisuh leitlun ah a rat ter ve a si. Tilik lak ihsin Noah le a sung pawl luatnak an rak co bangin Zisuh a zumtu lawng hell ram ihsin luatnak kan co ve ding a si. Pathian zum lo tu mipi pawl tidai sung ih an thi bangin Zisuh a zum duh lo tu pawl cu kumkhaw mei, hell ram ah an tla ve ding a si. Zisu zum duh lo hi a ṭih nung ngai ngai a si.

THUSUHNAK

1. Noah san lai ih minung pawl kha ziangtin an rak um?

2. Noah ih fapa pathum kha zo pawl an si?

3.  Pathian kha ziangruang ah a riahsia?

4. Pathian in leilung parah ni ziat sung ruah a sur ter?

5. Tilik ihsin zo pawlin luatnak an co?

6. Noah long kha ziang mi tlang parah a cawl?

7. Pathian in leitlun ah ti ka lik ter nawn lo ding ti lanternak ah ziang mi a tuah?

8. Noah le Tilik ihsin Zisuh rundamnak thu ziang mi kan zir thei?