NAUHAK NU TE MARY

(Zirnak 1) 

(Hi zirnak hi 1 ihsin 15 tiang a um. Sersiamnak ihsin sual thu, rundamnak thu ti'n peh vivo mi a si. Kan fa le pawlin an siar tikah an theithiam lo mi cafang tla a um ko ding, zangfah ten nu le pa pawlin in rak simfiangsak dingah ka lo sawm hai a si.)

      Khua hlanlai ah hin nauhak nu te Mary ti mi a rak um. A pa in a thihsan zo ruangah a nu thawn lawng an um. An mah cu an farah zet. Mary cun angki (kawr) tla tam pi a nei lo. A nu cun a fanu Mary cu harsa zetin a cawm ih tlawng a kai ter. Hmukphu (pocket money) a pek phah ṭheu. Mary cun a nu ih pek mi hmukphu cu hmangsiang lo in a khawl ringring. An farah zet nan Pathian an duhdawt zet ih mi tangdawr zet mi an si. Mary cu Zisuh zumtu a si ih Sunday school tla a kai ringring. A nu ih thu tla a lung zet. A rualpi pawl tla a duhdawt hai zet a si. 

                  Nikhat cu rin loh piin Mary cu a naa thlang. Sibawi an pan rero tla len dam ti a nei thei lo. A thih ni a nai cuah co. Cutikah Mary cun a nu cu hitin thu a cah ta.

       Mary: “Ka nu, ka thi a si kha len ṭap hlah aw maw. Ka fehnak ding hmun cu PATHIAN hnenah, vanram ah a si. Ka thi hnu ah ka angki neih mi tla hi farah pawl rak pek aw. Cu ṭheh len ka ihphah tangih tangka ka ret mi hmangin ka rualpi pawl PATHIAN thu sim tu rak ko sak aw maw,” ti’n thu a cah ta. Cutin Mary cu a thi. Mary nu cun a fanu ih cah ta vekin a rualpi pawl hrangah Pastor a ko sak ih crusade a tuahsak a si.

                     Mary vekin Zisuh na nei ve zo maw? “Kei cu ka nauhak tuk lai si. Zisuh nei a ṭul hrih lo,” na ti pang maw? Mary tla nauhak asinan Zisuh a nei. Na rualpi pawlin Zisuh an nei ve zo maw? Na theih mi Zisuh thu kha Mary vekin an hnenah sim ve aw. 

THUSUHNAK

1. Nauhak nu te Mary vekin Zisuh na nei ve zo maw?

2. Mary vekin rualpi Zisuh nei lo na nei maw?

3. Zisuh neilo na rualpi pawl ziangtin na bawm thei ding?

 A peh siar aw... (Click Zisu in Nauhak A Duhdawt )