LOT LE A NUPI

Lot hi Abraham ih unau pa Harana ti mi ih fapa a si. Pathian in Abraham a ko tikah Lot tla a hruai tel ve. Asinan an ṭilva kiltu pawl an tawhawk tikah ram an ṭhen aw. Lot cun hmun ram a nuam mi Sodom a hril ih cutawk ah an um. Lot cu nupi fanau nei a si. An sungte’n Sodom khua ah cun an um.

Sodom khua hi ram nuam zet asinan a sung um minung pawl an sualral tuk. Pathian tla an thei duh lo ih leitlun thil lawnglawng an ruat. Mi farah tla an bawm duh lo. Mikhual tla ṭha ten an zoh lo. Lunghak zet mi khua an si. Sodom khua ah cun Lot lawng hi Pathian zumtu a rak si. Ezekiel cun Sodom khaw mi pawl ih sualnak cu hitin a sim, “Ngaihnik, hihi na unau Sodom ih diklonak cu a si, hngalnak, rawl puarnak le zangzelnak tam zet cu amah ah le a fanu pawl ah an um. Mi farah le tlasam pawl ziangah an siar lo. An puarthau ih ka hmaiah fihnungza an tuah, cuiruangah ka lak hloh hai,” (Ezl 16:49) tiah a ti. Sodom khua cu an sual tuk ruangah Pathian in ka cimit ṭheh hai ding a ti. Abraham in mifel pahra tal an um ah cun siatsuah hlah aw, a ti ko nan, mifel pahra tla an um lo (Seem 18:32-33). 

Nikhat cu vancungmi pahnih Sodom siatsuah dingah an va (Seem 19:13). Lot in a rak tawng tikah a inn ah thleng dingin a dil hai. Cule an nih tla cu an thleng ve. Sodom khaw pawl cun Lot in mikhual a nei ti an thei tikah, a khaw senpiin upa nauta ti loin an ra pawk ciam co. Lot ih mikhual pahnih cu tuahmawh an tum thlang. Lot cun zangfah a dil hai ih, asinan an duh cuang lo. Lot cun, “Ka fanu pahnih parah nan duhduh in tuahmawh ko uh, asinan ka mikhual pahnih parah cun ziang kha tuah hlah uh,” a ti rero. Asinan misenpi pawl cu Lot ih inn sungah an lut thotho. Cutikah vancungmi pahnih cun misenpi pawl ih mit an cawt ter ṭheh a si. Pathian cun mikhual kan nei mi pawl hi ṭha ten zoh ding le duhdawt ding in duh. Ziangahtile mi hrekkhat mikhual cu vancungmi tla an rak si ṭheu ruangah a si (Hebru 13:2 ). Sodom pawl cun an rak palh riai.

Vancungmi pahnih cun Lot hnenah, “Na sung le dang pawl le na neih mi hmuahhmuah hi hmun ihsin suah pi ṭheh aw, hi ram hi kan siatsuah ding a si,” an ti thlang. Lot cu a va suak ih a fanu ih pasal pawl tla a sim ṭheh hai, asinan zo hmanin an lung duh lo. A copoh men ah an ruat. Cutikah vancungmi pawl cun, “Hinah ih na fanu pahnih le na nupi hruai aw la tlansuak zang uh,” an ti la la. An thinphang tuk tikah ziang si an tuah ding tla an thei lo. Cuti an um rero laiah Bawipa’n a zangfah hai ih a vancungmi pawl hmangin khawlengah a hruai suak hai. Cule Bawipa in, “Dunglet hawi hlah uh,” a ti hai. Lot ih nupi cun nuam tuk ih a rak umnak Sodom khaw kang rero mi cu seherh tukin a hun zoh kir sal. Cule ci-lung ah a cang a si Lot nupi bangin leitlun thilri ngainat tuk hi a ṭha lo mi a si. Ziangahtile cu pawl cun ṭhat nak in pek lo ih, siatnak in thlen sawn a si. 

Pathian in Lot te pa fa cu Sodom khawsenpi ur kang hlohnak ihsin a rundam hai. Cule Zoar timi khaw kiang ih lungpuk sungah an um. Lot kha amah ten Sodom ihsin tlansuak zik bangsehla a thi ding a si. Ziangahtile meisa kang lak ihsin tlansuak man dingin cahnak an nei lo. Cutikah Pathian in a zangfak ih vancungmi pawl a hruaisuah ter hai a si. 

Kan ni pawl tla hi Lot bangin hell ram sung ihsin mahten runsuak thei aw lo mi kan si. Cutikah Pathian in in zangfah hai tukin a fapa Zisuh hmangin in runsuak ve hai a si. Asinan Lot ih nupi cun Bawipa’i sim mi lung duh loin dunglet a hawi tikah a thi. Cubangtukin kan nih khal Zisuh ih in rundamnak kan zum duh lo asilen kumkhaw thihnak hell ah kan feh ve ding a si. Curuangah Zisuh hi in rundamtu ih kan cohlang le kan zum ding hi a thupi zet a si.

THUSUHNAK

1. Abraham ih unau pa’i fapa kha zo a si?

2. Lot cu khawinah ram ah a um?

3. Sodom khua ah mifel pahra an um kim maw?

4. Sodom mipi pawl ih sualnak kha Ezekiel in ziang a si a ti?

5. Pathian in mikhual pawl ziangtin zoh ding a duh?

6. Lot ih nupi kha ziangruangah ci-lung ah a cang?

7. Leitlun thilri duhdawtnak in ziang in thlen thei?

8. Zo in Lot le kha a runsuak?

9. Kan nih pawl the zo in hell ram ihsin in runsuak?