BIBLE THU

Bible hi ziang a si? Khawitawk in a ra? A ngantu zo pawl an si pei? Kum ziat sung an rak ngan, zo ih thu hla a sim, ti pawl thei tul mi tam pi a um. Mi tampi cun Bible hi milai ih tuah ding, tuah lo ding mi dan pawl ngannak ah kan ruat. Tuah ding le tuah lo ding pawl a nganawknak hmuh ding a um ko nan, Bible hi Pathian ih thu le milai hrang ah ziangmi in tuahsak ti mi thu pawl ngannak, Amah Pathian ih thu hla ngannak a si. Bible siarnak ihsin kan biak mi Pathian hi ziangvek Pathian a si, tile minung parah duhdawtnak ziangtluk ih thuk mi a nei ti pawl kan thei thei a si.

Khrihtian pawl ih kan siar rero mi Bible hmin sullam hi “cabu,” “cazual” lole, “ca thianghlim’ tinak a si. Bible sungah bu 66 a um. Cule Thukham hlun le Thukham thar tiah an ṭhen. Thukham hlun ah bu 39 a um ih Thukham thar ah bu 27 a um. A zate kom in bu 66 a si. Thukham hlun hi Hebrew tong ih ngan mi a siih, Latin tong ih ngan mi tla a um. Thukham thar lawngte Greek tong ih ngan mi a rak si. Tu san ih kan mah pawl ih siar mi pawl hi lehlinsal (translate) mi an si. 

Bible hi minung paziat pawl in an rak ngan ti asile minung 40 hrawngin an rak ngan. Semtirnak (Genesis) ihsi Thupuan (Revelation) tiang an rak ngan tikah kum 1500/1600 sung an rak rei. Bible ngantu lak ih a tel tu hrekkhat pawl cu, Moses, David, Soloman, Jeremiah, Isaiah, Paul, Peter, John, James, Mark, Mathai tivek-pawl tla an si. 

Bible an rak ngan tikah a ngantu pawl cu Pathian Thlarau in a kaihruai hai. Cutikah ngan sual mi le palh sual mi a um lo. Paul in hitin a rak sim, “Ca thianghlim hmuahhmuah hi Pathian ih thawkkhum mi a si,” (2Timote 3:16) a ti. A sullam cu “Pathian hnen ihsi a ra mi thu,” tinak a si. Bible hi milai ih phuah le tuah cawp mi thuan thu cabu men a si lo, Pathian hnen ihsi a ra mi, Amai thu, thutak a si. Pathian ih aw kan thei duh caan khal ah Bible siarnak in kan thei thei fawn a si. Bible sung rori ah in sim duh mi pawl a ngan ṭheh zo a si. 

Mi hrek in Bible hi, “Pathian in minung a duhdawtnak thu a ngannak cabu a si,” an ti. An sim dik zet. Ziangahtile Pathian in milai a duhdawtzet ruang ih in rundamnak hrang hna a ṭuan mi pawl le A Fapa Jesuh in pek-nak pawl Bible sung ah a sim theh a si. Cule Bible siarnak ihsin duhdawt tu, zangfah tu, ngaidam tu Pathian a sinak pawltla kan thei thei fawn a si.

Pathian in Bible siar ding in pe hi a sunglawi tuk. Nitin te Amai aw kan theitheinak cabu khal a si. Kan thinbang caan, beidawn caan, thinhar caan, thinnau caan khal ah in hnem theitu le in hnangamter theitu a si. Amah Pathian thawn pawlkawmawknak caan tha kan hmang duh asikhale Bible siarnak thawn kan pawlkawmaw thei ring ring a si.

THUSUHNAK

1. Bible ti mi ih sullam ziang a si?

2. Bible ah bu ziat a um?

3. Thukham hlun ah bu ziat a um?

4. Thukham thar ah bu ziat a um?

5. Bible hi minung paziat hrawngin an rak ngan?

6. Bible hi kum ziat sung an rak ngan?

7. Bible hi zo ih thawkkhum mi a si?

8. Thawtkhum timi cu ziang tinak a si?

9. Bible ngantu pawl kha zo in a umpi?

10. Bible hi zo ih thuhla ngannak a si?

11. Pathian aw na thei duh tik ah ziang mi na tuah ding?