BABEL LUNGDAWL

Noah cu tilik a kang hnuah kum zathum le sawmnga a nung. Cule kum zakua le sawmnga a siin a thi (Seem 9:28-29). A fale pathum pawlin fa tam pi an rung nei ih an te sin pawl tla in fa dang an ra nei vingvo. Cutin leitlun ah minung an ra karhzai vivo. Anmah san laiah leitlun ah ṭong pakhat lawng a rak um. Mi hmuahhmuah in cui ṭong pakhat lawng cu an ṭong in an theithiam a si. 

Noah ih te fa sin pawl cu Shinar ti mi ram ah hmunrawn pakhat an hmu ih, cutawkah an um. Cu tawk ram ih an um rero laiah hitin thu an ruat, “Kan hrangah khawpi pakhat le inn sangpi pakhat, a luzim van tawngin sak uhsi; cule kan hmin thangter uhsi,” (Seem 11:4) tiah an ti. An pupa pawl tilik ihsin rundamtu le an mah pawl kilkhawitu Pathian cu sunlawinak pek an hngilh ta riai. Anmah le anmah Pathian bangin sunlawinak pekawk an tum thlang. Cule Pathian tla an ṭul nawn lo ding, tinak a si. Pathian in an ruahnak ṭhalo pawl hi a hua zet a si.

  Mipi pawl cu an sim-awk cia bangin inn sangpi cu an sak thawk rero. An ṭong hman mi pakhat lawng a si tikah inn sangpi an sak mi cu an sak cak ngaingai. Cutiih mai sunlawinak hawl ih an sak rero laiah Pathian cu an inn sakmi zoh dingah a rung ṭum. Pathian in an thiltuah mi a hmu tikah, “Zohhnik uh, hi pawl hi an zaten miphun phunkhat an si ih ṭong pakhat an hmang. An tuah mihi thil tuah an tum mi a hramthawhnak lawng a si lai. Arei hlanah tuah an duh mi hmuahhmuah an tuahsuak thei ding. Cuhrangah kan vung feh pei ih pakhat le pakhat an aan an ciin awk lo dingah an ṭong kan cokrawi thluh pei,” (Seem 11:6-7) tiah a ti. Cule an ṭong pawl a cokrawi thluh ih a thlekdarh ṭheh hai. Miphun khat rori kha ṭong dangdang an ṭong ciam co ih inn sangpi tla an sak peh thei nawn lo. Pakhat in “Tlakrawh I pek aw,” a ti tikah  “Lungto” tla an pek-awk thlang. Pakhat le pakhat an ṭong an theithiam aw nawn lo. Cutikah leilungtlun khawzakip ah an ṭhekdarh aw ṭheh. Cuini ihsi thawkin an sakmi khawpi cu Babel tiin an ko. Ziangahtile Pathian in an ṭong a cokrawi ṭheh ruangah a si.  

Ziangruangah tuisun niah ṭong dangdang kan hmang ti asilen Babel lungdawl ruangah a si. Pathian kha sunlawinak pe duh lawn an mah ten Pathian bang duh ah sunlawinak an hawl ruangah a si. Pathian cu in duhdawtu le in kilhimtu a siih sunlawinak hmuahhmuah cu Amai ta a si. Pathian in porh aw tu le mipuar cu a duh lo. Zisuh bangih lungnem le tangdawr si dingah in duh a si (Filipi 2:5). 

THUSUHNAK

1. Noah tee-sin-fa pawlin ziang mi sak an rak tum?

2. Zianghrangah Babel lungdawl an rak sak?

3. Pathian in mipi pawl ih thinlung put a duh lo tikah ziangtin a tuah hai?

4. Ziangruangah ṭong dangdang leitlun ah kan hmang?

5. Pathian in ziang vek thinlung neitu pawl a hua?

6. Pathian in zo ih thinlung put vek nei ding in duh?

7. Sunlawinak le upatnak cu zo hnen ah pek ding a si?