ABRAHAM LE ISAAK

Pathian ih thukhamcia bangin Abraham le Sarah cun Isaak an ra nei. Isaak cu Abraham te nupa hrangah an tarlam fa a si ih an duhdawt hleice ngaingai. Cuihleiah Pathian ih thukham fa a si fawn a si. Abraham cu Pathian ṭihzah tu le duhdawttu a si. Pathian khalin “Ka rual” (Isaiah 41:8) tiah a ko. Cutlukin Pathian thawn an duhdawt aw.

Vawikhat cu Abraham amah te a um rero laiah Pathian in, “Abraham hi I duhdawt ngaingai maw ngaingai lo ka hniksak hnik ding,” a tiih “Abraham,” tiah a ko. Abraham kha cun, “Ka Bawipa, hinah ka um so khaw,” a ti. Cutikah Pathian cun, “Na duhzet mi na fapa neihsun Isaak cu hruai awla Moriah ramah fehpi aw. Cutawk ramih a um mi ka lo hmuh dingmi tlang parah Isaak cu mei-ur thawinak ah pe aw,” tiah a ti. Abraham hrangah a naa tuk ding. Ziangahtile Isaak cu a fapa neihsun a si hleiah a tarlam fa a si. Abraham hi a thinlung sungah cun a ṭap rero ko ding. Asinan Pathian a duhdawt tuk ruangah a fial vekin a tuah. Kan nih tla Pathian in Amah kan duhdawt ngaingai maw ti thei duh ah kan duhzet mi hmangin in hniksak ve ṭheu. Abraham vekih Pathian duhnak a thlun tu kan si ding a thupi tuk a si. 

Abraham cu zingpit ah a tho ih a tim a tuah. A fapa Isaak le a hnenum pahnih thawn Moriah tlang cu an pan rero. Raithawinak ding zanthing lawng an keng tikah Isaak cu a mangbang thlang. Cutikah Isaak cun, “Ka Pa, meiṭek le zanthing hmuah kan kengih thawinak hrangih tuu fate khui ahso?” a ti. Abraham hrangah tuar a har zet ding. Ziangahtile raithawinak ding cu a fapa Isaak a si ruangah a si. Isaak in len amah an hmang ding ti a thei fawn lo. Cutikah Abraham cun Isaak hnenah, “Amah Pathian in in pe leh ko ding, ka fa,” tiah a ti. Abraham hin Pathian a zum ngaingai ti a fiang. 

Cutin an feh rero hnuah Pathian ih sim mi hmun cu an thleng. Abraham cun raithawinak ding biakṭheng a tuah ih zanthing pawl a ret. Cule a fapa Isaak kha cu hridai thawn a ṭem ih biakṭheng parah cun a hlum. Abraham cun a fapa that dingin a nam a vun zuuk. Culai fangah Pathian in, “Abraham, Abraham!” Na fapa that hlah: zianghman a parah ti aw hlah. Na fapa neihsun ka hrangih na sian ruangah Pathian na ṭihzah zet a si ti kha ka thei zo a si,” tiah a ti. Cule Abrhamin a kiangkap a hei zoh ih tuucang pakhat hri hnok lakih a ki ih awk aw mi a hmu. A va lakih a fapa ai-ah ur thawinak ah a hmang. Abraham cu a lungawi tukih, cui hmun cu, “Jehovah-jireh,” tiah hmin a sak. “Bawipa ih tlangah ziang hmuahhmuah in pek a si (BSI)” tinak a si. 

Pathian in Abraham ih siannak le Pathian a duhdawtnak a hmuh tikah a lungawi tuk. Cutik ah Abraham cu thlawsuah a pek ih tesinfa tampi le an raal pawl tla an neh thluh ding thu pawl a sim cia. Cutin Abraham le Isaak cu an hnenum pawl kiangah an kirsal ih an umnak Beersheba ah an tlung sal.

Abraham nun ihsin “Pathian ṭihzah le a thulun hi thlawsuah conak,” a si ti kan thei thei. Cule Pathian fale pawlin hniksaknak kan tuar ṭheu ding, ti tla kan thei thei fawn a si. Hniksaknak pawl ra thleng ṭheu hmansehla Abraham vekin Pathian rinsan in kan pahtlang ve thei a si. Cule Isaak ai-ah tuucangte in thah a tuar bangin nangle kei thih ai-ah Zisuh Kross parah thah a tuar. Isaak cu tuucangte ruangah luatnak a hmu bangin nangle keitla Zisuh Khrih ruangah hell ram sung ta luatnak kan hmu ve a si. A va sunglawi so! Bawipa cu thangṭhat lo thei kan si lo. Amen!

THUSUHNAK

1. Abraham ih fapa kha zo a si?

2. Abraham ih nupi kha zo a si?

3. Pathian in Abraham kha ziangtin a ko?

4. Pathian in ziangruangah Isaak kha a dil?

5. Pathian fale pawlin kan nunnak ah ziang kan tawng theu ding?

6. Isaak ai-ah ziang thi?

7. Na ai-ah zo a thi ve?

8. Isaak thihnak ihsin a luat bangin khoinah ihsin na luat ve?

9. “Jehovah-jire” ti can hi ziang a si?
10. Pathian thulun cu ziangnak a si?